თბილისში, მრგვალ ბაღთან, არასამთავრობო ორგანიზაცია „იდენტობის“ მიერ დაანონსებული ღონისძიების გამო პოლიციაა მობილიზებული. ღონისძიებაზე დასწრება მხოლოდ წინასწარ აკრედიტებული ჟურნალისტებისთვისაა შესაძლებელი.
„იდენტობაში“ განმარტავენ, რომ ღონისძიების მიზანი გამოხატვის თავისუფლების მნიშვნელოვნების თაობაზე საზოგადოების ცნობიერების ამაღლებაა. მონაწილეებს სურთ, საზოგადოებასა და ხელისუფლებას 2012 წლის 17 მაისის საქმეზე სტრასბურგის სასამართლოს გადაწყვეტილება გააცნონ.
ღონისძიებაზე დასწრება მხოლოდ წინასწარ აკრედიტებული ჟურნალისტებისთვისაა შესაძლებელი.
შეგახსენებთ, ადამიანის უფლებათა ევროპულმა სასამართლომ 2012 წლის 17 მაისის საქმეზე საბოლოო განაჩენი გამოიტანა. განაჩენის თანახმად, 14 პირს საერთო ჯამში, სახელმწიფომ 32 000 ევრო უნდა აუნაზღაუროს, ხოლო ორგანიზაცია „იდენტობის“ სასარგებლოდ, 1 500 ევრო უნდა გადაიხადოს. ევროსასამართლოში ყველა განაცხადი 2012 წლის 3 და 5 ივლისის პერიოდში შევიდა, რომლითაც დაზარალებულები სისხლის სამართლის საქმის აღძვრას იმ მოქალაქეების წინააღმდეგ ითხოვდნენ, რომლებიც მათ თავს დაესხნენ. 2012 წლის 17 მაისს, ლგბტ პირების და უფლებადამცველი ორგანიზაციების მიერ, რუსთაველის გამზირზე, ჰომოფობიის წინააღმდეგ გამართულ აქციას დაპირისპირება მოყვა.