თამარ მეფის ხსენების დღესთან დაკავშირებით, თბილისის მუნიციპალიტეტის საკრებულოს ცენტრალურ დარბაზში საზეიმო ღონისძიება გაიმართა.
მნიშვნელოვანია, რომ ღონისძიება დედაქალაქის საკრებულოს ცენტრალურ დარბაზისათვის ბაგრატიონთა სამეფო დინასტიის წარმომადგენლის, ერთიანი საქართველოს პირველი ქალი მეფის - თამარ მეფის სახელის მინიჭებას მიეძღვნა. ეს განპირობებულია იმით, რომ მუნიციპალიტეტის ისტორიული შენობის ერთ-ერთი უმნიშვნელოვანესი ღირშესანიშნაობა - საკრებულოს ცენტრალური დარბაზი - წარმომადგენლობითი შეხვედრებისთვისაა განკუთვნილი, სადაც იმართება დედაქალაქისთვის და ზოგადად ქვეყნისთვის მნიშვნელოვანი ღონისძიებები. ამიტომაც ღვაწლმოსილი მეფის სახელის დარბაზისათვის მინიჭება, სიმბოლურიცაა. ზემოაღნიშნული დარბაზი შეხვედრებით, ოფიციალური მიღებებით, პრეზენტაციებითა და გამოფენებით მუდმივად დატვირთულია, რეგულარულად მასპინძლობს ქვეყნის საერო და სასულიერო ხელისუფლების, დიპლომატიური კორპუსის, ხელოვნების, მეცნიერებისა და სამოქალაქო საზოგადოების წარმომადგენლებს.
გიორგი ალიბეგაშვილი ღონისძიებაზე სიტყვით გამოვიდა და დამსწრე საზოგადოებას თამარ მეფის ხსენების დღე - თამარობა მიულოცა.
„მართლმადიდებელი ეკლესია დღეს თამარ მეფის ხსენების დღეს აღნიშნავს, რომლის მეფობის პერიოდი საქართველოს ისტორიაში „ოქროს ხანად“ მოიხსენიება. ძნელია, ადამიანმა ამომწურავად შეაფასოს უდიდესი მეფის, თამარის სახელმწიფოებრივი ღვაწლი.
მუნიციპალიტეტის ისტორიული შენობის ცენტრალური დარბაზისათვის თამარ მეფის სახელის დარქმევის ინიციატივაც შემდეგმა ფაქტორებმა განაპირობა: თამარ მეფე ქვეყნის აყვავებასთან ასოცირდება, დარბაზისადმი მისი სახელის დარქმევა კი გამოხატავს ჩვენს დამოკიდებულებას ქალების გენდერულ თანასწორობასთან.
ყველას გილოცავთ ჩვენს ეროვნულ და საეკლესიო დღესასწაულს - კეთილმორწმუნე მეფის თამარის ხსენების დღეს და ამ უდიდესი წმინდანის შეწევნითა და მფარველობით საქართველოს გაძლიერებასა და გამთლიანებას ვუსურვებ“, - განაცხადა გიორგი ალიბეგაშვილმა.
ღონისძიების ფარგლებში გამოიფინა თამარ მეფის ფრესკებისა და ფერწერული ტილოების ასლები.
ღონისძიებას საკრებულოს დეპუტატები, მეცნიერებათა აკადემიის წარმომადგენლები, სასულიერო პირები, მუზეუმებისა და მერიის წარმომადგენლები, საზოგადოება „თბილისელის“ წევრები, ისტორიკოსები და სხვა ცნობილი სახეები ესწრებოდნენ.
