ჭიათურაში, საბაგიროების მოსაწყობად ტრანსპორტირების კვლევის პირველი ეტაპი დასრულდა. საქართველოში ვიზიტად მყოფი, ფრანგული კომპანია „პომაგალსკის“ ვიცე-პრეზიდენტი კრისტიან ბუვიე საქართველოს რეგიონული განვითარებისა და ინფრასტრუქტურის მინისტრის მოადგილეს თენგიზ შერგელაშვილს შეხვდა და კვლევის შედეგები გააცნო. შეხვედრაზე ასევე სამომავლო გეგმები განიხილეს და თანამშრომლობის გზები დასახეს. კვლევა ჭიათურაში ფრანგული კომპანია სისტრას „სისტრას“ ტექნიკური ჯგუფის წარმომადგენლებმა აწარმოეს, რომელიც საბაგირო გზების სრული რეაბილიტაციის მიზნით ხორციელდება. ამის შემდეგ უკვე საბაგიროს მარშრუტებისა და ტიპის განსაზღვრა მოხდება.
პროექტის მიხედვით, სარეაბილიტაციო სამუშაოები ჭიათურის საბაგირო გზების 4 მონაკვეთს ჩაუტარდება (ჯამური სიგრძე 2,5 კმ ), რომელიც ქალაქის ცენტრს გარეუბნებთან დააკავშირებს. ბაგირგზები თანამედროვე სტანდარტების ტექნიკით აღიჭურვება, რომელიც ქსელის უსაფრთხოდ მუშაობას უზრუნველყოფს. ჭიათურის მოსახლეობის ძირითადი სატრანსპორტო საშუალების თანამედროვე აღჭურვილობისა და ტექნიკის მოწოდებას ფრანგული კომპანია „პომაგალსკი“ განახორციელებს. იგი, მსოფლიოს მასშტაბით, ერთ-ერთი წამყვანი კომპანიაა საბაგირო გზებისა და ბაგირიანი ტრანსპორტირების სისტემების პროექტირების, მშენებლობისა და ექსპლოატაციის სფეროში. ჭიათურის საბაგიროს სარეკონსტრუქციო-სარეაბილიტაციო სამუშაოების დასრულება 2016 წლის ბოლოს იგეგმება.
