15 მაისს 12:00 საათზე საქართველოს პარლამენტის ეროვნული ბიბლიოთეკის რესტავრაცია-კონსერვაციის განახლებული და ახლადაღჭურვილი ლაბორატორიის პრეზენტაცია გაიმართება. განყოფილება ათი გრანიტისზედაპირიანი სპეციალური სარესტავრაციო მაგიდით აღიჭურვება.
ეროვნული ბიბლიოთეკის რესტავრაცია-კონსერვაციის განყოფილებისთვის სპეციალური მაგიდები პირველად დამზადდა. მაგიდები სრულად შეესაბამება არსებულ სტანდარტებს და იდეალურია ტყავის დასამუშავებლად, წიგნების ყდების დასამზადებლად, ძველი, დაზიანებული ყდების აღსადგენად, ეროვნული ბიბლიოთეკის ფონდებში დაცული იშვიათი გამოცემების სარესტავრაციოდ. გრანიტისფილებიანი მაგიდები მოსახერხებელია ლანცეტითა და დანით სამუშაოდ.
ეროვნული ბიბლიოთეკის რესტავრაცია-კონსერვაციის განყოფილებისთვის ძვირადღირებული მაგიდები კომპანია ”კამარამ” დაამზადა. ბიბლიოთეკა კომპანიასთან ურთიერთთანამშრომლობის მემორანდუმს გააფორმებს.
რესტავრაცია-კონსერვაციის განყოფილების აღჭურვა მომავალშიც გაგრძელდება. დაგეგმილია ქაღალდის სარესტავრაციო მაგიდების დამზადებაც. ასევე ძველნაბეჭდი წიგნების აღდგენის დროს შესაძლებელი გახდება ყდებზე ძველი ორნამენტების აღდგენა და საჭიროების შემთხვევაში მოოქროვება.
რესტავრაცია-კონსერვაციის განყოფილება მუშაობს როგორც პერიოდული გამოცემების რესტავრაცია-აკინძვაზე, ისე ახალი და ხშირი გაცემისას დაზიანებული წიგნების აღდგენაზე. ამის პარალელურად ინტენსიურად მიმდინარეობს ეროვნული ბიბლიოთეკის ფონდებში დაცული იშვიათი გამოცემების რესტავრაციის პროცესი. ამ ეტაპზე აღდგენილია 400-მდე იშვიათი გამოცემა, მათ შორის უნიკალური გამოცემები პირადი კოლექციებიდან და ძველნაბეჭდი ქართული წიგნები.