კომპანია „საქართველოს ნერგები“ პირველად 2011 წელს გამოჩნდა საქართველოს სამომხმარებლო ბაზარზე. ის ერთ-ერთი დიდი და წამყვანი მეურნეობაა.
კომპანიას აქვს ორი სანერგე მეურნეობა ყვარელსა და სუფსაში, სადაც ხდება ქართული და უცხოური ჯიშების გამოყვანა, ძველი და უნიკალური ჯიშების აღდგენა. ამასთანავე, 2012 წლიდან კომპანია აქტიურად თანამშრომლობს ევროპის ქვეყნების სანერგე მეურნეობებთან.
"საქართველოს ნერგები" აქტიურად არის ჩართული ყველა პროექტში, რომელიც ხორციელდება საქართველოში, გამწვანებისა და ბიომრავალფეროვნების სფეროში.
წარმატებული პროექტებს შორის უნდა აღინიშნოს ევროკავშირისა და კავკასიაში ბუნების დაცვის მსოფლიო ფონდის („WWF“) წარმომადგენლობის მიერ დაფინანსებული რეგიონალური პროექტი: „კლიმატის ცვლილების პირობებში ტყის ეკოსისტემების მდგრადობის ამაღლება სამხრეთ კავკასის ქვეყნებში’’ და ამ პროექტის მიხედვით კომპანიამ 150 ჰექტარზე გაანაშენიანა სხვადასხვა სახეობის მერქნიანი მცენარეები.
მიმდინარე პროექტი, რომელსაც კომპანია ახორციელებს საერთაშორისო თანამშრომლობის საზოგადოება „GIZ“-ის დაკვეთით, დედოფლისწყაროში ქარსაფარი ზოლების აღდგენას ითვალისწინებს.
"GIZ"-ი გერმანიის ფედერალური მთავრობის საკუთრებაში არსებული საერთაშორისო ორგანიზაციაა. იგი 130-ზე მეტ ქვეყანაშია წარმოდგენილი, მისი მოქმედების არეალი სხვადასხვა სფეროებს მოიცავს. იგი, ძირითადად მუშაობს პარტნიორი ქვეყნების მთავრობებთან, სახელმწიფო უწყებებისა და კერძო სექტორის წარმომადგენლებთან.
"GIZ"-ი საქართველოს მხარდამჭერი 1992 წლიდან გახლავთ. საქართველოში ორგანიზაციის ეგიდით მიმდინარე პროგრამები შემდეგ სფეროებს მოიცავს: მდგრადი ეკონომიკური განვითარებისა და დემოკრატიის განვითარების ხელშეწყობა, ადგილობრივი თვითმმართველობის განვითარება, მოქმედი კანონმდებლობის დახვეწა, ბიომრავალფეროვნება და ენერგეტიკა.
უკვე წლებია გერმანიის საერთაშორისო თანამშრომლობის საზოგადოების (GIZ) წარმომადგენლები საქართველოსთან, კერძოდ, დედოფლისწყაროში, მდგრადი დეგრადირებული ლანდფშატის აღდგენის მიზნით ახალ ნერგებს და ქარსაცავ ზოლებს აშენებს.
მოსავლის მატების კუთხით დიდი მნიშვნელობა აქვს ქარსაფარ ზოლებს, რომელთა აღდგენაც დედოფლისწყაროში აქტიურად მიმდინარეობს. ქარსაფარი ზოლების აღდგენის პროექტის განხორციელება ხელს უწყობს ნიადაგის ეროზიის შემცირებას, სახნავ-სათესი მიწების ეკოლოგიური მდგომარეობის გაუმჯობესებებას და ნიადაგის ნაყოფიერების ზრდას.
პროექტის ფარგლებში კომპანია "საქართველოს ნერგებმა" 2000მ. სიგრძის 3 რიგში დარგო 8 სახეობის 2070 ნერგი. თითოეული მცენარის ირგვლივ ჩაერჭო სამი ცალი ბამბუკის ჯოხი და ირგვლივ შემოეხვა მავთულხლართი, აგრეთვე ორმოც მცენარეს ფესვის ყელთან გაუკეთდა "Tal-Ya"- ს ფირმის დამცავი საშუალება, რომელიც ასრულებს წყლის შემკრების ფუნქციას, იცავს ნიადაგს გამოშრობისაგან და სარეველებისაგან. "საქართველოს ნერგების" წარმომადგენლები, პერიოდულად ჩადიან დედოფლისწყაროში და ახორციელებენ მცენარეების მოვლას.
მცენარეთა მოვლა-პატრონობის მორიგი აქცია "საქართველოს ნერგების" თანამშრომლებმა ა/წ 5 მაისს გამართეს.
დღევანდელი მდგომარეობით ნერგებს 100%-იანი გახარება აქვს. კომპანია "საქართველოს ნერგების" წარმომადგენლები იმედოვნებენ, რომ მათი და Giz-ის თანამშრომლობა გაგრძელდება და მსგავს პროექტებში კვლავ მიიღებენ მონაწილეობას.