კულტურისა და ძეგლთა დაცვის მინისტრის მიხეილ გიორგაძის განცხადებით, უწყებათაშორისი კომისია სპეციალურ წესებს შეიმუშავებს, რომელიც გასტროლების დროს იმოქმედებს.
მინისტრმა ვახტანგ გორგასლის სახელობის ტაძარში დასვენებული ბავშვების მშობლებს მიუსამძიმრა და აღნიშნა, რომ მომხდარი ძალიან დიდი ტრაგედიაა.
„გამოძიებაც ჩატარდება და ყველაფერიც, მაგრამ ეს ამ ბავშვებს ვერ დააბრუნებს. ეს არის ყველაზე დიდი ტრაგედია. გარდა ამისა, ვფიქრობ, ჩემ კოლეგებთან ერთად, აუცილებლად არის შესამუშვებელი შესაბამისი რეგულაციები, რომელიც ზოგადად, იმ წესს განსაზღვრავს, რა წესითაც ბავშვების ჯგუფები მოძრაობენ“, - განაცხადა მიხეილ გიორგაძემ. მისი განმარტებით, უწყებათაშორისი კომისია დღეს შეიქმნება და მასში კულტურის, განათლების, სპორტისა და ახალგაზრდობის საქმეთა, ასევე, ჯანდაცვის სამინისტროს წარმომადგენლები შევლენ.
ქობულეთში, ჰასან ართმელაძის კუთვნილ სასტუმროში გუშინ გამთენიისას გაჩენილი ხანძრის შედეგად, სამი მცირეწლოვანი დაიღუპა. სასტუმრო „არმაზში“ რუსთავიდან ჩასული ბავშვთა ცეკვის ანსამბლის წევრები და მათი მშობლები იმყოფებოდნენ. გარდაცვლილთა იდენტიფიცირება ჯერ არ მომხდარა.
