თურქული კომპანიის კუთვნილი ტვირთმზიდი გემი ესპანეთის მიმართულებით მიცურავდა, თუმცა ლიბიის სანაპიროსთან, პორტ დერნას სიახლოვეს რადიკალმა ისლამისტებმა მას ჰაერიდან და ხმელეთიდან ჭურვები დაუშინეს.
ამის შესახებ ინფორმაციას თურქეთის საგარეო საქმეთა სამინისტრო ავრცელებს.
უწყების ცნობით, დაღუპულია გემის კაპიტნის თანაშემწე და დაზიანებულია რამდენიმე მეზღვაური.
შემთხვევა გუშინ, 10 მაისს მოხდა.
,,ხომალდზე იერიში ქალაქ დერნას პორტიდან 10 საზღვაო მილის დაშორებით მიიტანეს. მანამდე ჩვენ გავაფრთხიელთ ეკიპაჟი, რომ ამ პორტს არ მიახლოებოდა, რადგან მას ისლამისტი ტერორისტები აკონტროლებენ.” - აცხადებს ლიბიის შეიარაღებული ძალების წარმომადგენელი.
ის ადასტურებს, რომ კაპიტნის თურქი თანაშემწე დაიღუპა, დაზიანებით კი მხოლოდ ერთი მეზღვაური დაზიანდა.
გემს დაბომბვის შედეგად ცეცხლი გაუჩნდა და ის თორბუკის პორტის სიახლოვეს დრეიფობს.
ცნობილია, რომ ლიბიის ქალაქ დერნას 2014 წლის შემოდგომიდან ,,ისალმური სახელმწიფოს” მომხრე მებრძოლები აკონტროლებენ.
შეგახსენებთ, ცოტა ხნის წინ გავრცელდა ინფორმაცია იმის შესახებ, რომ ლიბიის წყლებში დაბომბილ სატვირთო გემზე საქართველოს ექვსი მოქალაქეც იმყოფება.
როგორც საქართველოს საზღვაო ტრანსპორტის სააგენტოში აცხადებენ, უწყება ამ დროისთვის ვითარებას არკვევს და უახლოეს პერიოდში მეზღვაურების სამშვიდობოს გამოყვანას შეეცდებიან.