«ყველა ღონე უნდა ვიხმაროთ იმისათვის, რომ ჩვენ არ ვიყოთ მილევადი ერი, წინააღმდეგ შემთხვევაში ჩვენ გავქრებით და გავქრებით მსოფლიო პოლიტიკური რუკიდანაც». ამის შესახებ გადაცემა «20 30»-ის ეთერში ისაუბრა თსუ-ს პროფესორმა გიორგი ლობჟანიძემ. მაგალითისთვის მან საფრანგეთი მოიყვანა, სადაც მეორე მსოფლიო ომის შედეგად მოსახლეობა კატასტროფულად შემცირდა. პროფესორის თქმით, გადასარჩენად საფრანგეთმა მარტივ ხერხს მიმართა – გადაწყდა, რომ ყველა ოჯახში ერთი შვილი მაინც უნდა გაჩენილიყო.
დემოგრაფიული აღორძინების ფონდის თავმჯდომარემ თამარ ჩიბურდანიძემ გადაცემაში აღნიშნა, რომ «დემოგრაფიული პრობლემები დაიწყო აფხაზეთის და შემდეგ ცხინვალის ომის ფონზე (მიგრაცია, მძიმე ეკონომიკური სიტუაცია, აბორტების საგანგაშო რაოდენობა, სიკვდილიანობის ზრდა)".
"ამის მოგვარებაზე არცერთ ხელისუფლებას არ უფიქრია, გარდა ზვიად გამსახურდიასი», - დასძინა ჩიბურდანიძემ.
შეგახსენებთ, სტატისტიკის ეროვნულმა სამსახურმა საყოველთაო აღწერის პირველადი შედეგები გამოაქვეყნა. შარშან ქვეყნის (ოკუპირებული ტერიტორიების გარდა) მოსახლეობის რაოდენობამ 3 729 635 მოსახლე შეადგინა, რაც 2002 წლის აღწერის მონაცემებთან შედარებით 14,7 % ნაკლებია.