რუსთავის მერის დავით ჯიქიას ინფორმაციით, ქობულეთის ერთ-ერთ სასტუმროში ხანძრის შედეგად დაღუპული ბავშვების ცხედრებს რუსთავის პროზექტურაში მიასვენებენ, შემდეგ კი იქიდან გადაასვენებენ ქალაქის ცენტრალურ ტაძარში. ამის შესახებ დავით ჯიქიამ აცნობა გადაცემა "იმედის კვირის" პირდაპირ ეთერში. მან ასევე აღნიშნა, რომ პროზექტურაში იდენტიფიკაციის მიზნით მოხდება ცხედრების დნმ-ის აღება .
"ეხლა ვიმყოფებით რიკოთის უღელტეხილზე. ჩემი იმფორმაციით, დაღუპული ბავშვების ცხედრებს ჯერჯერობით პროზექტურაში მიასვენებენ, სადაც მოხდება მათი განთვსება შესაბამის სასახლეებში, შემდეგ კი გადაასვენებენ ქალაქის ცენტრალურ ტაძარში", - განაცხადა რუსთავის მერმა და თავი შეიკავა ყოველგვარი განცხადებისაგან ტრაგიკული შემთხვევის გამომწვევ მიზეზებზე.
ცნობისთვის, ქობულეთში, სასტუმრო ”არმაზში” გაჩენილმა ხანძარმა სამი არასრულწლოვანის სიცოცხლე იმსხვერპლა. მოზარდები ბათუმში, კონცერტის გასამართად რუსთავიდან ჩავიდნენ და ქობულეთში სასტუმრო არმაზში იყვნენ დაბინავებულნი. გამოძიება სისხლის სამართლის კოდექსის 187-ე მუხლის მეოთხე ნაწილით მიმდინარეობს, რაც ნივთის დაზიანებას ან განადგურებას ნიშნავს, „რამაც გაუფრთხილებლობით გამოიწვია ორი ან მეტი ადამიანის სიცოცხლის მოსპობა, - თავისუფლების აღკვეთით ვადით ცხრიდან თორმეტ წლამდე".
