განსაკუთრებული, ამაღლებული განწყობა.,მძიმე, მაგრამ მაინც მხნე ნაბიჯები. დაუვიწყარი კადრები ეკრანზე. ნაცნობი მელოდიები. თვალზე მომდგარი ცრემლი. წარსულის გახსენება. 9 მაისის გამარჯვების სიხარული. საპატიო საჩუქრები და ბევრი სამადლობელი სიტყვა, ასე აღნიშნეს ისნის რაიონის ვეტერანებმა გამარჯვების დღე რესტორან „RIVER HALL”-ში, სადაც ისნის რაიონის გამგეობამ უმასპინძლა.
II მსოფლიო ომის მონაწილეების საპატივსაცემოდ გამართულ ღონისძიებას
ისნის რაიონის გამგებელი ვახტანგ ქიზიყურაშვილი, ქ. თბილისის საკრებულის
მაჟორიტარი დეპუტატები ირაკლი აბუსერიძე და ზურაბ ნეფარიძე ესწრებოდნენ.
“ შეუფასებელია იმ ადამიანების ღვაწლი, ვინც საკუთარი თავდადებისა და ქვეყნის სიყვარულით ამ დიდ გამარჯვებაში საკუთარი წვლილი შეიტანა. თქვენ ის ხალხი ხართ, რომელთა წინაშე ვალშია ჩვენი საზოგადოება და თითოეული ჩვენგანი. თქვენ ხართ გმირები, ქედს ვიხრით თქვენს წინაშე და ამ მოკრძალებული საჩუქრით, კიდევ ერთხელ გიდასტურებთ პატივისცემას“, - აღნიშნა ვეტერანებისადმი მიმართვაში ისნის რაიონის გამგებელმა ვახტანგ ქიზიყურაშვილმა.
„ჩვენთვის განსაკუთრებით სასიხარულოა ის ფაქტი, რომ ქვეყანას, ხელისუფლებას ვახსოვართ, დიდი მადლობა ისნის რაიონის გამგებელს ვახტანგ ქიზიყურაშვილს ასეთი თბილი, ლამაზი საღამო, რომ გვაჩუქა. დიდი მადლობა ყველას, ვინც გვაგრძნობინა, რომ ჯერ კიდევ საჭირონი ვართ“-განაცხადა II მსოფლიო ომის ვეტერანმა აკაკი სვანიძემ.