დედაქალაქის მუნიციპალიტეტის საკრებულოს ფრაქცია „ქართული ოცნება-დემოკრატიული საქართველოსთვის“ თავმჯდომარემ, ჩუღურეთის რაიონის მაჟორიტარმა დეპუტატმა რიმა ბერაძემ, ამავე რაიონის გამგებელთან, ზურაბ ჩიკვილაძესთან ერთად, მეორე მსოფლიო ომის ვეტერანებს ფაშიზმზე გამარჯვების 70 წლისთავი მიულოცა.
ჩუღურეთის რაიონში მეორე მსოფლიო ომის 60 ვეტერანი ცხოვრობს, რომელთაც რიმა ბერაძემ და რაიონის გამგებელმა სპეციალური ნობათი გადასცეს.
დეპუტატის განცხადებით, საქართველოს საკმაოდ დიდი წვლილი მიუძღვის ფაშიზმის დამარცხებაში და ხელისუფლებამ ვეტერანთა დაფასება მაქსიმალურად უნდა უზრუნველყოს.
„9 მაისი ძალიან მნიშვნელოვანი დღეა, არა მახოლოდ ქართველი ვეტერანებისთვის, არამედ მთელი მსოფლიოსათვის. პირველ რიგში, ვულოცავ ჩვენს ვეტერანებს ფაშიზმზე გამარჯვების დღეს, ჯანმრთელობას და დღეგრძელობას ვუსურვებ. დღეს ჩვენ გვინდოდა მოვფერებოდით ამ ადამიანებს, რადგან სწორედ ისინი იბრძოდნენ საქართველოს თვითმყოფადობისათვის და მათი ღვაწლი უდავოდ დასაფასებელია. ამიტომ, ჩვენთვის სამაგალითო ადამიანებს უნდა შევუქმნათ ცხოვრების ღირსეული პირობები“- განაცხადა რიმა ბერაძემ.
როგორც რიმა ბერაძემ აღნიშნა, ხელისუფლების გადაწყვეტილებით ვეტერანები სპეციალურად დღევანდელი დღისათვის დამზადებული მედლებით დაჯილდოვდნენ და 1000 ლარის ოდენობის თანხა გადაეცათ.