საქართველოს რეგიონული განვითარებისა და ინფრასტრუქტურის სამინისტრო, ინფრასტრუქტურული პროექტების განსახორციელებლად, ბიუჯეტიდან გამოყოფილ სახსრებს გეგმიურად ხარჯავს და უწყების მიერ 2015 წლის პირველ კვარტალში ათვისებული ბიუჯეტის მაჩვენებელმა 107% შეადგინა _ ამის შესახებ საქართველოს რეგიონული განვითარებისა და ინფრასტრუქტურის მინისტრმა, ნოდარ ჯავახიშვილმა დარგობრივი ეკონომიკისა და ეკონომიკური პოლიტიკის, საფინანსო-საბიუჯეტო, აგრარულ საკითხთა, რეგიონული პოლიტიკისა და თვითმმართველობის, გარემოს დაცვისა და ბუნებრივი რესურსების კომიტეტების გაერთიანებული სხდომაზე განაცხადა. მისივე თქმით, ძალიან მნიშვნელოვანია საზოგადოების ნდობის მოპოვება იმასთან დაკავშირებით, რომ სამინისტროს საჯარო ფინანსებიდან გამოყოფილ 1 მილიარდ ლარს უწყება სწორად და კანონის სრული დაცვით განკარგავს.
„ეს ფული ეფექტურად იხარჯება ქვეყნის განვითარებაზე. ჩვენი ხელისუფლების მიზანია კორუფციული გარიგებების შესაძლებლობის მინიმუმადე დაყვანა. შეკითხვები, რომლებიც საზოგადოებაში ჩნდება სამინისტროს მუშაობის, კონკრეტული პროექტების ან ტენდერების მიმართ, პასუხგაუცემელი არ უნდა დარჩეს,
ხელისუფლებაში მოსვლამდე ჩვენ ხშირად ვაკრიტიკებდით იმ ზეცენტრალიზაციას, რომელიც ზოგადად სახელმწიფოში და კონკრეტულად ინფრასტრუქტურული პროექტების განხორციელების საქმეში არსებობდა. მხოლოდ ხელმძღვანელი პირების შეხედულებით თანხების ხარჯვის პირობებში ჩნდება ელიტური კორუფციის რისკებიც და არც მოსახლეობის საჭიროებების გათვალისწინება ხდება.
ამის ერთ-ერთი გზად გვესახება სამინისტროს და მუნიციპალიტეტების სამეურნეო ფუნქციებისგან განტვირთვა. ბევრი რამ, რაც დღეს სახელმწიფო კომპანიების მიერ ხორციელდება, უფრო წარმატებით შეიძლება გააკეთოს კერძო სექტორმა. ამდენად, ჩვენ შევისწავლით სამინისტროს დაქვემდებარებაში და მუნიციპალიტეტების კუთვნილებაში მყოფი სამშენებლო, კომუნალური თუ სხვა საწარმოების პრივატიზაციის შესაძლებლობის საკითხს და გააზრებულად მივიღებთ მათი გაყიდვის გადაწყვეტილებას. აუთსორსინგის მექანიზმის გამოყენებით პროექტების განხორციელება უფრო ხარჯთეფექტური გახდება, შემცირდება კორუფციის რისკები და ბიუჯეტში დამატებით შემოსავლებს მივიღებთ.“ _ განაცხადა ნოდარ ჯავახიშვილმა.
