დედაქალაქის მუნუციპალიტეტის საკრებულოში, დიდუბის რაიონის მაჟორიტარმა დეპუტატმა ვლადიმერ ძნელაძემ კავკასიის სამართლის სკოლის მესამე კურსის სტუდენტს ნოდარ ჭიაბრიშვილს უმასპინძლა, რომელმაც მიმდინარე წლის 15-18 აპრილს აშშ-ში, ნებრასკას უნივერსიტეტში ორგანიზებულ კლიენტთა კონსულტირების უნარ-ჩვევების საერთაშორისო გუნდურ შეჯიბრში სხვა ქართველ სტუდენტებთან ერთად მიიღო მონაწილეობა და მეორე ადგილი დაიკავა.
ნოდარ ჭიაბრიშვილის დაფინანსება დეპუტატის ინიციატივითა და დიდუბის გამგეობის შუამდგომლობით განხორციელდა.
როგორც ვლადიმერ ძნელაძემ აღნიშნა, ნიჭიერი სტუდენტების ხელშეწყობა ქვეყნის უმნიშვნელოვანეს პრიორიტეტს უნდა წარმოადგენდეს.
„პირველ რიგში, მინდა სტუდენტებს საერთაშორისო კონკურსში ასეთი მნიშვნელოვანი გამარჯვება მივულოცო და წარმატება ვუსურვო. მიმაჩნია, რომ ქვეყანამ უნდა იზრუნოს ნიჭიერი თაობის მხარდასაჭერად. მოხარული ვარ, რომ ჩვენ დავეხმარეთ ნოდარ ჭიაბრიშვილს და ვფიქრობ, მომავალშიც შევძლებთ ახალგაზრდების ამგავრ წახალისებას“ - განაცხადა ვლადიმერ ძნელაძემ.
საქართველოში კლიენთა კონსულტირების უნარ-ჩვევებში ეროვნული შეჯიბრი 20 სხვადასხვა უნივერსიტეტს შორის გაიმართა და ჟიურის გადაწყვეტილებით, რომელიც ამერიკელი სპეციალისტებით იყო დაკომპლექტებული, საქართველოს 2015 წლის ჩემპიონად კავკასიის უნივერსიტეტის სამართლის სკოლა (CSL) დასახელდა.
შეხვედრას ასევე თბილისის მერის მოადგილე დიმიტრი ქუმსიშვილი დაესწრო.
