"ევროკავშირის პრიზი ჟურნალისტიკაში 2015"- ასე ეწოდება კონკურსს, რომელსაც ევროკავშირი საქართველოში პრესის თავისუფლების საერთაშორისო დღესთან დაკავშირებით აცხადებს.
"ევროკავშირის პრიზი ჟურნალისტიკაში" არის პირველი ისეთი ინიციატივა საქართველოში, რომლის მიზანია ქართულ მედიაში ისეთი ჟურნალისტური ნაშრომების აღიარება, რომელიც ხელს უწყობს ევროკავშირის ღირებულებების უკეთ გაგებას, შესრულებულია პროფესიულ დონეზე და ჟურნალისტური ეთიკის მაღალი სტანდარტების დაცვით.
გამარჯვებულები გამოვლინდებიან ხუთ საპრიზო კატეგორიაში:
1. საუკეთესო საგამომძიებლო სტატია ბეჭდვით ან ონლაინ მედიაში;
2. საუკეთესო საგამოძიებო ტელე/რადიო სიუჟეტი;
3. საუკეთესო ონლაინ ან ბეჭდური ბლოგი;
4. ყველაზე ინფორმატიული ონლაინ მედია საშუალება (ახალი ამბების სააგენტო, ვებპორტალი, ონლაინგაზეთი, ონლაინჟურნალი);
5. საუკეთესო დოკუმენტური ფოტო
საქართველოში ფოტოჟურნალისტიკის წახალისების მიზნით, რათა ფოტოგრაფებმა თავიანთ ფოტოებში აღბეჭდონ ევროპული ღირებულებები, წელს საპრიზო კატეგორიას დაემატა საუკეთესო დოკუმენტური ფოტოს ნომინაცია. აღნიშნული პრიზი გადაეცემა ფოტოს ავტორს, რომელიც ადამიანის უფლებებს საუკეთესოდ ასახავს მათ შორის უმცირესობათა უფლებებს, სოციალურ სამართლიანობას, ადამიანური ღირსების პატივისცემას, სიტყვის თავისუფლებას, დემოკრატიას, თანასწორობასა და კანონის უზენაესობას", - აღნიშნავენ ევროკავშირის წარმომადგენლობაში.
მათივე განმარტებით, თითოეულ გამარჯვებულს გადაეცემა ფულადი პრემია 1,500 ევროს ოდენობით.
"წელს ევროკავშირის სადამკვირებლო მისია ასევე აცხადების "მშვიდობის ჟურნალისტიკის პრიზის" მესამე რაუნდს. ევროკავშირის სადამკვირვებლო მისიის (EUMM) "მშვიდობის ჟურნალისტიკის პრიზი" ენიჭება საუკეთესო ნაშრომს ბეჭდურ, აუდიოვიზუალურ ან ონლაინმედიაში, რომელიც შეეხება კონფლიქტების თემას. გამარჯვებული ჟურნალისტი სტიპენდიას მიიღებს და გაემგზავრება ლონდონში ომისა და მშვიდობის მოხსენებით ინსტიტუში (IWPR), მთავარ ოფისში, კავკასიის პროგრამაში მონაწილეობის მისაღებად", - განმარტავენ საქართველოში ევროკავშირის წარმომადგენლობაში.
საკონკურსო ნამუშევრების წარდგენის ბოლო ვადაა 2015 წლის 2 ნოემბერი.
"ევროკავშირის პრიზი ჟურნალისტიკაში 2015"-ის შესახებ დეტალური ინფორმაციის გაცნობა შესაძლებელია ვებ-გვერდზე: www.euprizejournalism.ge
