კახეთში, ლოზუნგით - "ვირბინოთ მათთვის, ვისაც ეს არ შეუძლია" მსოფლიო მარათონი გაიმართა. მსოფლიო რბენა მსოფლიოს 33 ქვეყანაში, მათ შორის საქართველოში ზუსტად 15:00 საათზე დაიწყო. მარათონში მონაწილეობას საქართველოდან 5 ათასი ადამიანი იღებს.
ღონისძიებაში, მოხალისეებთან ერთად, მონაწილეობენ სპორტსმენები და პოლიტიკოსები, მათ შორის არიან თავდაცვის ყოფილი მინისტრი ირაკლი ალასანია და შს მინისტრის მოადგილე არჩილ თალაკვაძეც. კახეთში იმყოფება კულტურის მინისტრი მიხეილ გიორგაძეც, თუმცა ის მარათონში მონაწილეობას წელს არ იღებს და ადგილზე გულშემატკივარის სტატუსით იმყოფება.
საქველმოქმედო მარათონს ფინიშის ხაზი არ აქვს. მარათონის დაწყებიდან რამდენიმე წუთში სტარტის ხაზიდან ავტომობილი დაიძვრება და ყველა ის მორბენალი, რომელსაც ავტომობილი გადაასწრებს მარათონს ავტომატურად გამოეთიშება.