შეფასებისა და გამოცდების ეროვნული ცენტრის გეოგრაფიის ჯგუფი ერთიანი ეროვნული გამოცდებისათვის გამსწორებელთა შესარჩევ კონკურსს აცხადებს. 
კონკურსი 30 ვაკანტურ თანამდებობაზე ცხადდება. 

კონკურსში მონაწილე პირი უნდა აკმაყოფილებდეს შემდეგ პირობებს:მას უნდა ჰქონდეს გეოგრაფის ან გეოგრაფიის მასწავლებლის დიპლომი და/ან ჩაბარებული გეოგრაფიის მასწავლებელთა სასერტიფიკაციო გამოცდა (კონკურსში გამარჯვების შემთხვევაში კონკურსანტმა უნდა წარმოადგინოს შესაბამისი დოკუმენტები შეფასებისა და გამოცდების ეროვნულ ცენტრში);ოჯახის წევრი/წევრები არ უნდა აბარებდნენ 2015 წლის ერთიან ეროვნულ გამოცდებს.

შეფასებისა და გამოცდების ეროვნული ცენტრის  ინფორმაციით, კონკურსში მონაწილეობის მისაღებად კონკურსანტმა უნდა გაიაროს რეგისტრაცია ვებგვერდზე www.naec.ge 1-დან 5 ივნისამდე (სასურველი ბრაუზერი: Mozila Firefox და google chrome).

კონკურსი ჩატარდება ელექტრონულად სპეციალური პროგრამის გამოყენებით 7 ივნისს 10:00 საათიდან 18:00 საათამდე.

აპლიკანტებს საშუალება ექნებათ სახლიდან გაუსვლელად შეასრულონ 350 დავალება და გამოავლინონ საკუთარი კომპეტენცია.

გამოცდის დაწყებამდე, 1-დან- 5 ივნისის ჩათვლით მონაწილეებს საშუალება ექნებათ ივარჯიშონ - გაასწორონ ნაშრომები ელექტრონული პროგრამის საშუალებით. 

არა უგვინეს 25 ივნისისა, კონკურსის შედეგების მიხედვით შედგება რეიტინგული სია და გამოვლინდებიან გამარჯვებულნი.

2015 წელს გამსწორებელთა კონკურსს მხოლოდ გეოგრაფიის ჯგუფი ჩაატარებს.