საქართველოს მოსახლეობის საყოველთაო აღწერის წინასწარი შედეგების თანახმად, მოსახლეობის 4,7 პროცენტიანი კლებაა დაფიქსირებული. აღწერის წინასწარი შედეგები ჟურნალისტებს დღეს გამართულ პრესკონფერენციაზე საქსტატის ხელმძღვანელმა მერი დაუშვილმა გააცნო.
,,საქართველოს მოსახლეობის რიცხოვნობა, ოკუპირებული ტერიტორიების გარდა, 3 729 635 ადამიანს შეადგენს, რაც წინა, 2002 წლის აღწერის შედეგთან (4 371 535) შედარებით 14,7 პროცენტით (641 900) ნაკლებია.. ქალაქის მოსახლეობამ 2 მილიონ 140 126 ადამიანი შეადგინა. სოფლის მოსახლეობამ კი - მილიონ 589 509 ადამიანი. შემცირება ძირითადად - 23, 8 პროცენტით სოფლის მოსახლეობამ განიცადა, როდესაც იმავე პერიოდში ქალაქის მოსახლეობა 6,3 პროცენტით არის გაზრდილი. საქართველოს თითქმის ყველა რეგიონში, წინა აღწერასთან შედარებით, მოსახლეობის კლებაა დაფიქსირებული” - აღნიშნა დაუშვილმა. მისი განმარტებით, მოსახლეობის კლება ძირითადად განპირობებულია მიგრაციის პროცესებით.
ერთადერთი რეგიონი, სადაც მოსახლეობის მატება დაფიქსირდა, 3,4 პროცენტით, თბილისია. თუმცა ეს, ძირითადად მცხეთისა და გარდაბნის მუნიციპალიტეტების სოფლის ტიპის დასახლებების თბილისთან შეერთებით არის განპირობებული.
ამ დროისთვის დედაქალაქის მოსახლეობის რაოდენობა 1 118 035 ადამიანს შეადგენს.
აღწერის საბოლოო შედეგები 2016 წლის აპრილში გამოქვეყნდება.
