ისნის რაიონის გამგებელი ვახტანგ ქიზიყურაშვილი ორგანიზაცია „კავშირი ადამიანებისთვის განსაკუთრებულ ზრუნვას რომ საჭიროებენ“ (APNSC) და ჩეხეთის დიაკონიის (Diakonia-ECCB) წარმომადგენლებს შეხვდა.
შეხვედრის უმთავრესი მიზანი შეზღუდული შესაძლებლობების მქონე პირების, მათი მომსახურე დღის ცენტრების საჭიროებებისა და არსებული პრობლემების გაცნობა იყო.
ორგანიზაცია „კავშირი ადამიანებისთვის განსაკუთრებულ ზრუნვას რომ საჭიროებენ“ გენერალურმა მენეჯერმა თორნიკე რაზმაძემ და ჩეხეთის დიაკონიის აღმოსავლეთ ევროპის დეპარტამენტის უფროსმა( Diakonia-ECCB) ევა ლაცინოვამ აღნიშნეს, რომ პროექტი „ხელი ხელს“ ჩეხეთის საელჩოსა და დიაკონია ჩეხეთის თანადგომით ხორციელდება და ადგილობრივ თვითმმართველობასთან აქტიურ თანამშრომლობას ითვალისწინებს.
„დიაკონია ჩეხეთი“ სიდიდით მეორე ორგანიზაციაა ჩეხეთში, რომელიც სოციალურ პროექტებს ახორციელებს, წარმატებით ვმუშაობთ შშმ პირებთან და გვინდა თქვენც გაგიზიაროთ ჩვენი გამოცდილება. ჩვენმა ორგანიზაციამ კარგად იცის როგორ დაეხმაროს ამ ადამიანებს“ - აღნიშნა ევა ლაცინოვამ.
როგორც ისნის გამგებელმა ვახტანგ ქიზიყურაშვილმა განაცხადა: „ ძალიან მნიშვნელოვანია შშმ პირებთან დაკავშირებული პროექტების მხარდაჭერა და ჩეხეთის გამოცდილების გაზიარება . ეს არის ადგილობრივი თვითმმართველობისა და არასამთავრობო სექტორის თანამშრომლობის კარგი მაგალითი. ადგილობრივი თვითმმართველობა განსაკუთრებულ ყურადღებას უთმობს ადამიანებს, რომლებსაც საზოგადოების თანადგომა ესაჭიროებათ. ჩვენთვის ერთ-ერთი პრიორიტეტი სწორედ ამ ადამიანების მოთხოვნების გათვალისწინება და მხარდაჭერაა. იგივე ისნის გამგეობის მაგალითი შემიძლია მოვიყვანო, როდესაც შშმ პირს, რომელიც ისეთ მიუვალ ადგილზე ცხოვრობს, რომ წლების განმავლობაში ფაქტობრივად ვერ ახერხებდა სახლიდან გასვლას, ორმოცი მეტრის კიბე-პანდუსი დავუმონტაჟეთ, რომლის ღირებულებამ 18 000 ლარი შეადგინა. ეს ფაქტი კარგად ასახავს ჩვენს დამოკიდებულებას და მიდგომას არსებული პრობლემისადმი, სწორედ ამიტომ გამგეობის დიდი სურვილია ხელი შეუწყოს მსგავს ორგანიზაციებს, საჭიროა შეიქმნას რეალური გეგმა, რომლის განხორციელებაშიც თვითმმართველობა აქტიურად ჩაერთვება“.
