მალარიის ახალი კერების აღმოჩენის სრულიად გამორიცხვა შეუძლებელია. ამის შესახებ, 25 აპრილს, მალარიასთან ბრძოლის საერთაშორისო დღეს, აფხაზურ გამოცემებთან საუბარში ოკუპირებული სოხუმის სანეპიდსაგურის მთავარმა ექიმმა ალა ბელიაევამ განაცხადა.
მისი თქმით, აფხაზეთის ტერიტორიაზე მალარიით დაავადების ბოლო შემთხვევა გასული საუკუნის 60-ან წლებში დაფიქსირდა და საბჭოთა კავშირის პერიოდში, ამ პრობლემის მოგვარება ერთობლივი ძალებით შეძლეს. ბოლო პერიოდში კი ოკუპირებული აფხაზეთის ხელისუფლება სათანადო ყურადღებას აღარ აქცევს სამელიორაციო და დაჭაობებული ტერიტორიების დაშრობის სამუშაოებს, რაც ადგილობრივი გარემოსთვის საკმაოდ პრობლემური საკითხია.
ბელიაევას განცახდებით, აფხაზეთში აღარ ირგვება ევკალიპტები, რომელიც ნიადაგის გამოშრობას უწყობს ხელს და წყალსატევებში არც თევზის სახეობა - გამბუზიას უშვებენ, რომელიც კოღოს ჭუპრებით იკვებება.
ასეთ პირობებში კი დაავადების გადამტანი კოღოს მომრავლების შესაძლებლობები იზრდება.
,,ჩვენთან მალარიის გადამტანი კოღოები ბლომად არიან, მაგრამ საბედნიეროდ არ გვყავს დაავადების მატარებლები. თუმცაღა, ადვილი შესაძლებელია, აფრიკის ან აზიის ისეთი ქვეყნებიდან, სადაც მალარია ,,ყვავის,” ჩვენთანაც შემოვიდეს ვინმე და ეს დაავადება შემოიტანოს.
მიგრანტები შემოსვლისას რამდენიმე ინფექციაზე, მათ შორის მალარიაზეც გადიან შემოწმებას, მაგრამ იმის საშუალება, რომ რესპუბლიკაში შემოსულ ყველა სტუმარს შემდეგში კუდში სდიონ, არ არსებობს.” - აღნიშნა სოხუმის მთავარმა სანიტარმა.
