საქართველოში ჰაერის დაბინძურების მხრივ არსებულ მდგომარეობაზე, მის გამომწვევ მიზეზებსა და გამოსწორების გზებზე GHN-მა კომენტარი ეკოლოგიის ექსპერტს გელა კვაშილავას სთხოვა.
ექსპერტის განმარტებით, ბოლო წლებში საქართველოში ავტომობილების რაოდენობა მნიშვნელოვნად გაიზარდა და 5 წლის წინ თუ 600 ათასი იყო, 2014 წლის მონაცემებით, მათმა რიცხვმა მილიონს გადააჭარბა.
,,შემოყვანილი მანქანების უმეტესობა არის საკმაოდ ძველი, შესაბამისად, საწვავსაც მეტს მოიხმარს. საქართველოში შემოტანილი საწვავი კი ხარისხით ბევრად ჩამოუვარდება ევროპაში არსებულ სტანდარტებს.
ეს ყოველივე იწვევს ჰაერში სხვადსხვა სახის მავნე ნივთიერებების გამოყოფას, როგორიც არის აზოტის დიოქსიდი, ნახშირბადის მონოქსიდი, მყარი ნაწილაკები, ნახშირის მური, CO2 და სხვა.
ქუჩებში ავტომობილების მოძრაობის გაზრდასთან ერთად, მაგალითად თბილისში, მტვრის ნაწილაკების არსებობა დაშვებულ ნორმაზე ბევრად მაღალია, ასევე მაღალია იმ დამაბინძურებლების მაჩვენებლები, რაც ზემოთ ჩამოვთვალეთ.
ეს ყოველივე მოსახლეობაში ჯანმრთელობის გაუარესებას იწვევს და ხელს უწყობს ისეთი სნეულებების გავრცელებას, როგორიც არის ასთმა, გულ-სისხლძართვთა დაავადებები, ბრონქიტი და სიმსივნეები.”
კვაშილავა აცხადებს, რომ სტატისტიკურად, ავადობების 17 % და სიკვდილიოანობის 19 % გარემოს დაბინძურებით არის გმოწვეული.
რაც შეეხება ზოგადად ჰაერის დაბინძიურებას, გამოკვლევების შედეგად დადგენილია, რომ ჰაერის დაბინძურების გამომწვევი მიზეზებიდან 71 % ტრანსპორტზე მოდის.
,,გამოსავალი არსებობს და ესაა ტრანსპორტზე კონტროლის გამკაცრება და მაღალი ხარისხის საწვავსა და უსაფრთხო ეკო-ტრანსპორტზე აქცენტის გაკეთება.
წინააღმდეგ შემთხვევაში საზოგადოებრივი ჯანდაცვის კუთხით პრობლემები მოიმატებს.
საჭიროა, დაიხვეწოს ჩვენი საკანონმდებლო ბაზა და სტიმული მიეცეს სუფთა საწვავის ბაზრის განვითარებას.
ასევე, საჭიროა, ეკოლოგიის თვალსაზრისით იმ საკანონმდებლო ინიციატივების გათვალისწინება, რასაც ევროკავშირი ასოცირების ხელშეკრულებით გვთავაზობს.
ქალაქების განვითარებისთვის აუცილებელია მისი ურბანული დაგეგმარებისას პრიორიტეტი სუფთა გარემოზე, გამწვანებაზე, რეკრეაციული ზონების მოწყობასა და ეკო ტრანსპორტზე გაკეთდეს.
აუცილებელია, აგრეთვე, მოსახლეობის ინფორმირება, სპეციალური კამპანიის წარმოემოება და ეკო-აქტიურობა, როგორც მთავრობის, ისე საზოგადოების და არასამთავრობო ორგანიზაციების მხრიდან.” - აღნიშნა თან საუბარში გელა კვაშილავამ.
შეგახსენებთ, რომ ინტერნეტში ვიდეორგოლი გავრცელდა თუ როგორ აჯარიმებენ უცნაური უნიფორმის მქონე თანამშრომლები ავტომობილების მძღოლებს მავნე გამონაბოლქვისთვის. როგორც ირკვევა, ისინი 2015 წლის აპრილში შექმნილი სპეციალური საინიციატივო ჯგუფის, „ეკოპოლისიის“ თანამშრომლები არიან. აღნიშნული სამსახური მიზნად ისახავს ქალაქში ჰაერის დაბინძურების დონის რეგულირებას. სხვა სიტყვებით, ეს ნიშნავს დამატებით გადასახადებს ავტომობილების მფლობელთათვის. ვიდეოში ჩანს, რომ „ეკოპოლისიის“ თანამშრომლები ავტომობილების მძღოლებს მავნე გამონაბოლქვისთვის გამაფრთხილებელ ქვითარს უტოვებენ. მანქანებს ადგილზე ამოწმებენ და ჯარიმის ოდენობა ჰაერის დაბინძურების ხარისხზეა დამოკიდებული. რა უწყების თანამშრომლებიც არიან „ეკოპოლისიის“ თანამშრომლები ამაზე უნიფორმიანები განმარტებას არც თავად აკეთებენ და მათზე განმარტებას არც თბილისის მერია აკეთებს. ჯერ-ჯერობით გაურკვეველია არის თუ არა ჯარიმის ოდენობა ფიქსირებული ან რის მიხედვით ვარირებს, თუმცა ფაქტი ერთია - ბენზინის ფასის ბოლოდროინდელი მკვეთრი ვარდნით გამოწვეული სიხარული ხანმოკლე გამოდგა.