დღეს, 16 აპრილს 24:00 საათზე გლდანის რაიონში მდებარე გიორგი მინდელის სახელობის ხიდი გამოცდა-გამოკვლევის მიზნით დაიკეტება.
სატრანსპორტო საშუალებების მოძრაობა გლდანიდან ფეიქრების ქუჩის, დიდი დიღმიდან კი ბელიაშვილის ქუჩის მიმართულებით იქნება შესაძლებელი.
მთელი ღამის განმავლობაში ე.წ. მინდელის ხიდზე განთავსდება სატვირთო მანქანები და ნაგებობა სხვადასხვა მანევრირებით გამოიცდება.
პარალელურად, სპეციალისტები ხიდზე მიმნდინარე პროცესებს სპეციალური ხელსაწყოებით შეამოწმებენ.
ხიდის მდგომარეობის შესახებ საბოლოო დასკვნა რამდენიმე კვირაში გახდება ცნობილი.
ე.წ. მინდელის ხიდის გამოცდით თბილისის მასშტაბით 20 ხიდისა და მეტეხის გვირაბის გამოკვლევა-გამოცდის პროექტი დასრულდება.
მერიის ინფორმაციით, კვლევის მიზანია ნაგებობების მდგომარეობის დადგენა და საჭიროების შემთხვევაში, შემდგომი სარეაბილიტაციო სამუშაოებისა და მათი ღირებულების განსაზღვრა. ეტაპობრივად მზადდება დასკვნები უკვე გამოკვლეული ხიდებისა და გვირაბის შესახებ. საჭიროებების მიხედვით, რამდენიმე მათგანზე უკვე დაწყებულია პროექტირებისთვის საჭირო სამუშაოები. სპეციალისტების დასკვნებისა და რეკომენდაციების გათვალისწინება იგეგმება სხვა გამოკვლეულ ნაგებობეთან მიმართებაშიც.
ხიდებისა და მეტეხის გვირაბის გამოკვლევა-გამოცდის სამუშაოებს ს.ს.ი.პ. საქართველოს ტექნიკური უნივერსიტეტის ხიდსაცდელი ცენტრი აწარმოებს. პროექტისათვის დედაქალაქის ბიუჯეტიდან 397 900 ლარია გამოყოფილი.