თბილისის მუნიციპალიტეტის საკრებულოს თავმჯდომარე გიორგი ალიბეგაშვილი დედაქალაქის მერთან დავით ნარმანიასთან ერთად თბილისში ჰოლოკოსტის მსხვერპლთა ხსოვნისა და ევროპელ ებრაელთა გმირობისადმი მიძღვნილ ღონისძიებას დაესწრო.
ებრაულ მუზეუმში გამართულ ღონისძიებაზე, იერუსალიმის მემორიალური მუზეუმის მიერ, ისრაელის სახლთან და საქართველოს განათლების სამინისტროსთან თანამშრომლობით გადაღებული დოკუმენტური ფილმის “ქართველი შინდლერი” ჩვენება გაიმართა.
საკრებულოს თავმჯდომარე გიორგი ალიბეგაშვილი ღონისძიებაზე სიტყვით გამოვიდა, ქართულ–ებრაული ურთიერთობების მრავალსაუკუნოვან ტრადიციაზე ისაუბრა და ჰოლოკოსტის დროს დაღუპული ადამიანების ოჯახებს და მთლიანად ებრაელ ერს კიდევ ერთხელ მიუსამძიმრა.
“დღევანდელი დღე კიდევ ერთი შეხსენებაა იმისა, რომ სიძულვილის ენა და კაცთმოძულეობა ყველაზე დიდი ბოროტებისა და უარყოფითი შედეგის მომტანია.
დღესაც მომსწრე ვართ, თუ როგორი სისასტიკით მიმდინარეობს ბრძოლა რელიგიებს შორის სირიაში. საშინელი კადრების მომსწრენი ვართ.
ადამიანის მთავარი მოვალეობა ურთიერთსიყვარული და ურთიერთპატივისცემაა. ამის დასტური და სანიმუშო მაგალითი ქართველი და ებრაელი ერების ურთიერთობაა.
არასოდეს ამ ორ ერს შორის არ ყოფილა სიძულვილისა და დაპირისპირების ენა. მადლობა ამისთვის უფალსაც და ადამიანსაც”,-განაცხადა გიორგი ალიბეგაშვილმა.
ღონისძიებას დედაქალაქის საკანონმდებლო და აღმასრულებელი ორგანოს წარმომადგენლები, ებრაული დიასპორის , ბიზნესისა და აკადემიური წრეების წარმომადგენლები და ფილმის “ქართველი შინდლერი” მთავარი გმირის სერგი მეტრეველის ოჯახის წევრები ესწრებოდნენ.
საღამო, ისრაელის სახლისა და საქართველო–ისრაელის ბიზნეს პალატის ორგანიზებით გაიმართა.
წელს ებრაული სამყარო ჰოლოკოსტის მსხვერპლთა ხსოვნის დღეს (იომ-ა-შოა) 16 აპრილს აღნიშნავს. იომ-ა-შოა ნაცისტური რეჟიმის მიერ 6 მილიონი ებრაელის, მათ შორის ერთი მილიონი ბავშვის ხსოვნის პატივსაცემადაა დადგენილი. ევროპაში, ებრაული წინააღმდეგობის სიმბოლო 1943 წლის 19 აპრილს ვარშავის გეტოს აჯანყება გახდა, რომელიც სამკვირიანი წინააღმდეგობის შემდეგ, გერმანულმა სამხედრო ნაწილებმა სისხლში ჩაახშვეს.
