თბილისის მუნიციპალიტეტის საკრებულოს თავმჯდომარემ გიორგი ალიბეგაშვილმა და დედაქალაქის მერმა დავით ნარმანიამ მსახიობისა და პოეტის, ნიკო გომელაურის სახელობის სკვერი გახსნეს.
სკვერი, რომელიც თავისუფლების მოედანზე, ალექსანდრე გრიბოედოვისა და თავისუფალი თეატრების გვერდით მდებარეობს, მერიის ინიციატივით დაარსდა, მისი კეთილმოწყობის სამუშაოები კი თბილისის განვითარების ფონდმა განახორციელა.
გახსნის ცერემონიას დედაქალაქის წარმომადგენლობითი და აღმასრულებელი ორგანოების, ასევე კულტურის სამინისტროს წარმომადგენლები, მსახიობის მეგობრები და მისი შემოქმედების თაყვანისმცემლები ესწრებოდნენ.
საკრებულოს თავმჯდომარემ ღონისძიებაზე, ნიკო გომელაურის ცხოვრებასა და შემოქმედებაზე საუბრისას აღნიშნა, რომ მსგავსი პროექტები ძალიან მნიშვნელოვანია, ვინაიდან მათი მეშვეობით დედაქალაქისთვის ძვირფასი ადამიანებისთვის პატივის მიგება და მათი სახელების უკვდავყოფა ხდება.
“საოცრად ამაღელვებელი, სადა და ამავდროულად გულწრფელი დღეა, ისეთივე სადა და გულწრფელ გარემოში როგორიც ნიკო გომელაური იყო. მსგავსი პროექტები მნიშვნელოვანია არა მარტო ქალაქის იერსახისთვის, არამედ საშუალებას იძლევა პატივი მივაგოთ დედაქალაქისთვის ძვირფას ადამიანებს და მათი სახელები მომავალ თაობას შემოვუნახოთ. გომელაურის პოეზია თავისი სისადავით, გულწრფელობით და სიყვარულის უნიკალური გამოვლენის ფორმით გამორჩეულია მისი თანამედროვე პოეტების შემოქმედებისგან. შეიძლება ნაადრევია ამის თქმა, მაგრამ მის ლექსებზე ბევრი ახალგაზრდა გაიზრდება და ისწავლის“, – განაცხადა გიორგი ალიბეგაშვილმა და აღნიშნა, რომ თუ საჭიროება იქნა, თბილისის საკრებულო მზად არის ნიკო გომელაურის ბიუსტის შესაქმნელად კონკურსი გამოაცხადოს.
სკვერში, ნიკო გომელაურის ფოტო-გამოფენაც გაიმართა, სადაც დამთვალიერებელს შესაძლებლობა ჰქონდა მსახიობის ცხოვრებისა და მოღვაწეობის საინტერესო ეპიზოდები ეხილა.
ნიკო გომელაურის ლექსები ლითონის ასოებით დაიწერა და სკვერის საფეხმავლო მონაკვეთზე, სკამებსა და კედელზე განთავსდა.
პროექტის ავტორი თბილისის მერიის არქიტექტურის სამსახურის უფროსი ნინო ღოღობერიძეა. მსახიობის მონუმენტი კი მოქანდაკე როკო ირემაშვილის ავტორობით დაიდგა.
სკვერის გახსნის ღონისძიება თბილისის განვითარების ფონდმა და მერიის კულტურის საქალაქო სამსახურმა უზრუნველყო.
მსახიობი ხუთი წლის წინ, 39 წლის ასაკში გარდაიცვალა. ის დიდუბის მწერალთა და საზოგადო მოღვაწეთა პანთეონშია დაკრძალული.
