თბილისის სასწავლო უნივერსიტეტის რექტორი, პროფესორი სოლომონ პავლიაშვილი ლონდონში იმყოფებოდა, სადაც ლონდონის კომერციის სკოლის (London School of Commerce) მარკეტინგის სამსახურის უფროს, სამეჩი ზომლოტს შეხვდა.
შეხვედრაზე გადაწყდა, რომ თბილისის სასწავლო უნივერსიტეტი საქართველოში ამ სკოლის წარმომადგენელი იქნება და აღნიშნული სკოლის საბაკალავრო, სამაგისტრო და სადოქტორო პროგრამებზე, შესაბამისი საშეღავათო პირობებით, ქართველი და რეგიონის სხვა ქვეყნების სტუდენტების გაგზავნის ორგანიზებას მოახდენს.
მხარეები, ასევე, შეთანხმდნენ, რომ ლონდონის კომერციის სკოლის სამაგისტრო და სადოქტორო პროგრამებზე წასვლის მსურველებისთვის თბილისის სასწავლო უნივერსიტეტში შესაბამისი მოსამზადებელი პროგრამები განხორციელდება.
აღსანიშნავია, რომ ლონდონის კომერციის სკოლას მსოფლიოს სხვადასხვა ქვეყანაში 170 ათასი სტუდენტი ჰყავს.
"სასიამოვნოა, რომ შეხვედრის ორგანიზატორები თბილისის სასწავლო უნივერსიტეტის კურსდამთავრებულები - თამუნა კვანტალიანი და მიხეილ ბჟალავა იყვნენ, რომლებიც ლონდონის კომერციის სკოლის სამაგისტრო და სადოქტორო პროგრამებზე სწავლობენ", _ განაცხადა თბილისის სასწავლო უნივერსიტეტის რექტორმა, პროფესორმა სოლომონ პავლიაშვილმა.