თბილისის მუნიციპალიტეტის საკრებულოს თავმჯდომარე გიორგი ალიბეგაშვილი, კოალიცია „ქართული ოცნება - დემოკრატიული საქართველოსთვის“ დეპუტატებთან ერთად, აღდგომის ბრწყინვალე დღესასწაულს მცხეთაში, სვეტიცხოვლის საკათედრო ტაძარში შეხვდა და მათთან ერთად სააღდგომო ლიტურგიას დაესწრო.
სადღესასწაულო ღვთისმსახურება სრულიად საქართველოს კათალიკოს-პატრიარქმა, უწმინდესმა და უნეტარესმა ილია მეორემ აღავლინა.
გიორგი ალიბეგაშვილმა უფლის ბრწყინვალე აღდგომა სრულიად საქართველოს მიულოცა.
„ქრისტეს აღდგომა გამორჩეული და უდიდესი დღესასწაულია მართლმადიდებლურ სამყაროში. მინდა სრულიად საქართველოს, თითოეულ ჩვენს თანამოქალაქეს, ეს ბრწყინვალე დღესასწაული მივულოცო, სიხარული და ჯანმრთელობა ასევე წინსვლა ვუსურვო.
ვულოცავ ჩვენს ქვეყანას ამ დიდებულ დღეს, ღმერთმა სულ გამარჯვების გზაზე ატაროს საქართველო. ქრისტე აღსდგა!“, - განაცხადა გიორგი ალიბეგაშვილმა.
სვეტიცხოვლის საკათედრო ტაძარში სააღდგომო მსახურებას პრეზიდენტი, პრემიერ-მინისტრი, დედაქალაქის მერი, ასევე აღმასრულებელი და საკანონმდებლო ხელისუფლების წარმომადგენლები ესწრებოდნენ.
