საქართველოს პრეზიდენტი რომის პაპთან შეხვედრის შემდეგ პირველ კომენტარს აკეთებს. მარგველაშვილის თქმით მან პაპს მიაწოდა ინფორმაცია ქვეყანაში არსებულ ვითარებაზე.
"რომის პაპს მივაწოდე ინფორმაცია საქართველოს ისტორიის შესახებ, ვუამბე მას ჩვენი უნიკალური ქვეყნის და ისტორიის შესახებ. ჩვენ ვისაუბრეთ დღევანდელობაზე და იმ სირთულეებზე რაც ქართულ-ევროპულ ურთიერთობებს თან ახლავს. ასევე ვისაუბრეთ იმ როლზე, რაც საქართველომ სამომავლოდ უნდა შეასრულოს რეგიონში,"- განაცხადა გიორგი მარგველაშვილმა.
შეგახსენებთ, რომ საქართველოს პრეზიდენტი გიორგი მარგველაშვილი რომის პაპს რამდენიმე საათის წინ შეხვდა. თითქმის 45 წუთიანი პირისპირ საუბრის შემდეგ გაიმართა ვატიკანისა და საქართველოს დელეგაციების გაფართოებული შეხვედრა.
დღესვე გიორგი მარგველაშვილი წმინდა საყდრის სახელმწიფოებთან ურთიერთობის მდივნის მოადგილეს და სახელმწიფო სამდივნოს წარმომადგენლებს შეხვდა. ვიზიტის ფარგლებში გიორგი მარგველაშვილი უკვე შეხვდა ვატიკანში აკრედიტებულ ელჩებსაც. საუბარი შეეხო საქართველოს ოკუპირებული ტერიტორიების არაღიარების პოლიტიკას.
საქართველოს პრეზიდენტის ოფიციალური ვიზიტი ვატიკანში დასრულებულია.