გერმანიიდან საქართველოში სიცოცხლისთვის საშიში ავტომანქანები ჩამოდის. ჟურნალისტური გამოძიება გერმანიის საზოგადოებრივმა მაუწყებელმა ჩაატარა. ჟურნალისტებმა ქვეყანაში მოქმედი თაღლითური ქსელი გამოავლინეს, რომლის წევრებიც ავარიის შედეგად დაზიანებულ მანქანებს ორად ჭრიან და საქართველოში კონტეინერებით აგზავნიან. ამ გზით ისინი კონტეინერში ადგილს ზოგავენ და თითოეული კონტეინერიდან 20 ათასიანი მოგება რჩებათ. საქართველოში მანქანები თავიდან ეწყობა და მათი საშუალო ღირებულება 7400 დოლარამდე მერყეობს. გერმანელი ექსპერტების დასკვნით, ავარიის შემთხვევაში ასეთ ავტომობილში გადარჩენის შანსი პრაქტიკულად ნულის ტოლია.
