საქართველოს პრეზიდენტმა გიორგი მარგველაშვილმა, სპორტის საერთაშორისო დღესთან დაკავშირებით, საქართველოს შეიარაღებული ძალების ის დაჭრილი მეომრები დააჯილდოვა, რომელთაც კალიფორნიის შტატის საზღვაო ქვეითთა ბაზა პენდელტონზე საერთაშორისო შეჯიბრებებში - „დაჭრილ მეომართა თამაშებში" წარმატებით იასპარეზეს. დაჯილდოების ცერემონიალი პრეზიდენტის ადმინისტრაციაში გაიმართა.
უმაღლესმა მთავარსარდალმა „დაჭრილ მეომართა თამაშებში" გამოვლენილი მებრძოლი სულისა და მიღწეული წარმატებებისათვის ღირსების მედლები მაიორებს - მურთაზ ოსეფაიშვილს, მალხაზ შეყელაშვილს, კაპრალებს - გულადი თოდუას, ჯიმშერ ჩხენკელს, ტრისტან ჩიტიძეს, ლევან მიქავას, უფროს სერჟანტს - ლაშა ხურციძეს, უმცროს სერჟანტებს - დავით მახარეიშვილს, იაკობ ზოსიაშვილს, ბახვა დარსალიას, გიორგი ბოჭორიშვილსა და მასტერ სერჟანტს - ალექსი ტაბატაძეს გადასცა.
სიტყვით გამოსვლისას, საქართველოს პრეზიდენტმა დადებითად შეაფასა თავდაცვის სამინისტროს როლი დაშავებული სამხედროების რეაბილიტაციისა და მათი საზოგადოებაში ინტეგრაციის საქმეში. მან, ასევე, ყურადღება სამხედროების მიერ გაწეულ ღვაწლზე გაამახვილა. „თქვენ ემსახურებით სამშობლოს და ამაში ყველაზე მნიშვნელოვანი წვლილი, თქვენი ჯანმრთელობა გაიღეთ. თქვენი სამსახური ამით არ შემოიფარგლა და თქვენ შეძელით გამბედაობის, სიცოცხლისუნარიანობის მაგალითი მიგეცათ საზოგადოებისთვის“ - აღნიშნა მან.
მოგვიანებით თავდაცვის მინისტრმა, მინდია ჯანელიძემ, მედიასთან დაშავებული სამხედრო მოსამსახურეების მხარდამჭერ პროგრამებზე ისაუბრა: „ჩვენ მხარს დავუჭერთ მსგავსი პროგრამების განვითარებას, ჩვენს სამხედროებს, რადგანაც ეს არის მათთვის ძალიან კარგი საშუალება ფსიქოსოციალური რეაბილიტაციისათვის; ამასთან ერთად, ეს არის ჩვენი წარმატებაც. ჩვენმა პარაოლიმპიელებმა შეძლეს, ამ კუთხით დიდი ტრადიციების მქონე ქვეყნების პარაოლიმპიელებს აჯობეს, მედლები მოიპოვეს და გვასახელეს“.
დაჯილდოების ცერემონიალს სპორტისა და ახალგაზრდობის საქმეთა მინისტრი ლევან ყიფიანი, საქართველოს შეიარაღებული ძალების გენერალური შტაბის უფროსი, გენერალ-მაიორი ვახტანგ კაპანაძე, ასევე საქართველოში შეერთებული შტატებისა და დიდი ბრიტანეთის ელჩები დაესწრნენ.
