დაჭრილი პოლიციელის ვალერიან გრძელიშვილის ჯანმრთელობის მდგომარეობა გუშინდელთან შედარებით გაუმჯობესებულია.
ექიმების ინფორმაციით პოლიციელის ჯანმრთელობის მდგომარეობა სტაბილურად მძიმეა თუმცა მკურნალობას ექვემდებარება.
"პაციენტი უკვე გონებაზეა, საუბარი შეუძლია, მაგრამ კვლავ მართვით სუნთქვაზე არის. ქირურგიული თვალსაზრისით გაუმჯობესება არის. თუ რამე გართულება არ მივიღეთ, ავადმყოფი წესით კარგად უნდა იყოს. ამას დროს გვაჩვენებს," - განაცხადა მკურნალმა ექიმმა გია აზმაიფარაშვილმა.
უბნის ინსპექტორ-გამომძიებელი ბექა მარგიშვილი დეტექტივის თანაშემწე - გამომძიებელ ვალერიან გრძელიშვილთან ერთად 4 აპრილს, საღამოს საათებში, თბილისში, ვარკეთილის მეტროსთან, ჯავახეთის ქუჩაზე, სამსახურებრივ მოვალეობას ასრულებდა, რა დროსაც მათ გადამოწმების მიზნით პიროვნება შეაჩერეს.
აღნიშნულმა პირმა მოულოდნელად პოლიციელების მისამართით ცეცხლსასროლი იარაღიდან ცეცხლი გახსნა და შემთხვევის ადგილიდან მიიმალა. სროლის შედეგად ორივე სამართალდამცველი დაიჭრა.
მოგვიანებით ერთ-ერთი მათგანი, ბექა მარგიშვილი დაიღუპა. ვალერიან გრძელიშვილს კი მკურნალობა უტარდება.