დედაქალაქის მუნიციპალიტეტის საკრებულოს თავმჯდომარე, გიორგი ალიბეგაშვილი კათოლიკური, სომხური სამოციქულო და ევანგელურ-ლუთერანული ეკლესიის მრევლს მაცხოვრის აღდგომის ბრწყინვალე დღესასწაულს ულოცავს.
„მინდა სრულიად კათოლიკურ სამყაროს, სომხური სამოციქულო და ევანგელურ-ლუთერანული ეკლესიის მრევლს და ყველა იმ ადამიანს მივულოცო მაცხოვრის ბრწყინვალე აღდგომა, ვინც ამ დღის დადგომას დასავლური კალენდრის მიხედვით ზეიმობს.
ჩვენ ძალიან დიდი ისტორია გვაკავშირებს კათოლიკურ სამყაროსთან და მომავალშიც ვაპირებთ ამ ურთიერთობის კიდევ უფრო გაღრმავებას. დასაფასებელი და აღსანიშნავია კათოლიკური ეკლესიის განუზომელი წვლილი საქართველოს ისტორიაში.
ასევე არ შეიძლება არ აღინიშნოს ქართველთა და სომეხთა მრავალსაუკუნოვანი ძმობის ისტორია, რომელიც უმნიშვნელოვანეს ადგილს არა მხოლოდ ქრისტიანულ ცივილიზაციაში, არამედ კაცობრიობის ისტორიაში იკავებს.
აქვე ხაზგასმით მინდა აღვნიშნო, რომ უკვე მრავალი წელია, რაც ლუთერანული ეკლესიის მრევლი მრავალკონფესიური საქართველოს განუყოფელ ნაწილს წარმოადგენს და განსაკუთრებული გულისხმიერებით იღწვის ჩვენი სამშობლოს უკეთესი მომავლისათვის.
მინდა უკლებლივ ყველას, ვინც ამ კალენდრით ზეიმობს აღნიშნულ დღესასწაულს, მივულოცო მაცხოვრის აღდგომის ბრწყინვალე დღესასწაული და ჩვენი თანამემამულეების სიხარული გავიზიარო. ვუსურვებ მათ იმედს, რწმენასა და მშვიდობას ჩვენი სამშობლოს საკეთილდღეოდ. მრავალს დასწარით!“