აუტიზმის ცნობადობის ამაღლების მსოფლიო დღესთან დაკავშირებით, საქართველოს რეგიონული განვითარებისა და ინფრასტრუქტურის მინისტრის პირველმა მოადგილემ გიორგი ამაშუკელმა, მუნიციპალური განვითარების ფონდის აღმასრულებელ დირექტორ, ილია დარჩიაშვილთან ერთად, დღეს, თბილისში „ფსიქოლოგიური მომსახურების ცენტრი - „მწვანე სახლი“ გახსნა. „მწვანე სახლი“ სარეაბილიტაციო ცენტრია, რომელიც აუტიზმის მქონე ბავშვებს მკურნალობასა და საზოგადოებასთან ინტეგრაციაში ეხმარება. ობიექტის სარემონტო სამუშაოები საქართველოს მუნიციპალური განვითარების ფონდმა სახელმწიფო დაფინანსებით განახორციელა და მისი ღირებულება 65 143 ლარია.
სარეაბილიტაციო ცენტრი, აუტიზმის სინდრომის მქონე ბავშვების გარდა, ფსიქოლოგიურ დახმარებას ადაპტაციის პრობლემების, განვითარების შეფერხებისა და ემოციური დარღვევებისა მქონე ბავშვებსაც უწევს. „მწვანე სახლი“ ფრანგული მოდელის მიხედვით შეიქმნა და მას დაარსების დღიდან მხარს უჭერს საფრანგეთის საელჩო საქართველოში. ცენტრის ინფორმაციით, ყოველწლიურად ისინი დაახლოებით 300 ბავშვსა და მათ მშობლებს ფსიქოლოგიური გადახრების პრევენციასა და მკურნალობაში ეხმარებიან. „მწვანე სახლს“ დაარსების დღიდან 1000-ზე მეტი მცირეწლოვანი ბავშვისთვის აქვს შესაბამისი მკურნალობა ჩატარებული. თუმცა, ამორტიზებული შენობის გამო, გასული წლის თებერვალში ცენტრმა მუშაობა დროებით შეაჩერა, რამაც ბავშვებისთვის ფსიქოლოგიური დახმარების შეწყვეტა გამოიწვია. სარეაბილიტაციო ცენტრის დირექტორისა და თბილისის მერიის მიმართვის საფუძველზე, საქართველოს მთავრობის განკარგულების შესაბამისად, რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდმა, „მწვანე სახლის“ შენობის სრული რეკონსტრუქცია განახორციელა.
პროექტის ფარგლებში მოხდა ამორტიზირებული შენობის დემონტაჟი და შენობის რემონტი, დამონტაჟდა ცენტრალური გათბობის სისტემა. სარეკონსტრუქციო სამუშაოები საერთაშორისო სტანდარტის შესაბამისად განხორციელდა, რათა მსგავსი ტიპის საჭიროების მქონე ბავშვებს შესაძლებლობა ჰქონდეთ, დახმარება შესაბამის გარემოში მიიღონ. 2 აპრილი აუტიზმის შესახებ ინფორმაციის გავრცელების მსოფლიო დღედ 2007 წლის 18 დეკემბერს გაეროს გენერალურმა ასამბლეამ გამოაცხადა. ამ თარიღის აღნიშვნის მიზანია, გაზარდოს აუტიზმის შესახებ საზოგადოების ინფორმირებულობა, რათა დაცული იქნას აუტიზმის მქონე ადამიანების ფუნდამენტური უფლებები. საქართველოს რეგიონული განვითარებისა და ინფრასტრუქტურის სამინისტრო და მუნიციპალური განვითარების ფონდი უერთდება აღნიშნულ მიზანს და მაქსიმალურად შეეცდება თავისი წვლილი შეიტანოს არსებული პრობლემის მოგვარებასა და ცნობიერების ამაღლებაში.