დედაქალაქის მუნიციპალიტეტის საკრებულოს გარემოს დაცვის კომისიის თავმჯდომარე შორენა ბუხრაშვილი ცხოველების მოვლა-პატრონობისა და მათი პოპულაციების მართვის წესთან დაკავშირებით კიდევ ერთ განმარტებას აკეთებს და აღნიშნავს, რომ იმედის არხზე, გუშინ გადაცემა „იმედის კვირაში“ გაჟღერებული ინფორმაცია ყოველგვარ საფუძველს არის მოკლებული.
შორენა ბუხრაშვილის განცხადებით, გადაცემის ეთერში გასვლამდე რამოდენიმე საათით ადრე, მას იმედის ჟურნალისტი დაუკავშირდა, რომელსაც დეპუტატმა აღნიშნულ საკითხთან დაკავშირებით ამომწურავი ინფრომაცია მიაწოდა, თუმცა როგორც შორენა ბუხრაშვილმა განაცხადა, მისი არცერთი განმარტება გადაცემა „იმედის კვირაში“ არ გაჟღერებულა, რაც იძლევა იმის საუძველს, რომ აღნიშნულ წესთან დაკავშირებით, საზოგადოების შეცდომაში შეყვანა მიზანმიმართულად ხორციელდება.
„პირველ რიგში მინდა გამოვეხმაურო გუშინ, გადაცემა „იმედის კვირაში“ გაჟღერებულ ინფორმაციას იმის თაობაზე, თითქოსდა საკრებულოს გარემოს დაცვის კომისია, დაჩქარებული წესით აპირებს ცხოველთა მოვლა-პატრონობისა და მათი პოპულაციების მართვის წესში, ცხოველების ცეცხლსასროლი იარაღით მოკვდინებისა და ევთანაზიის გამოყენებას, რაც სიმართლეს არ შეესაბამება.
გარდა იმისა, რომ მე, გადაცემის ეთერში გასვლამდე პირადად ვესაუბრე ჟურნალისტს, გადაცემის მსვლელობის დროს, საკრებულოს პრესამსახურის ხელმძღვანელი ,,იმედის კვირის“ პროდიუსერს დაუკავშირდა და საზოგადოების ზუსტი ინფორმირებისათვის ჩემი პირდაპირ ეთერში ჩართვის თხოვნით მიმართა, რაზეც მან უარი მიიღო.
მინდა კიდევ ერთხელ განვუმარტო საზოგადოებას, რომ აღნიშნული პროექტი თბილისის მერიიდან საკრებულოში მიმდინარე წლის 2 მარტს შემოვიდა, რის შემდეგაც წარმომადგენლობით ორგანოში არაერთი სხდომა გაიმართა.
გარწმუნებთ, რომ გარემოს დაცვის ან სხვა რომელიმე კომისია, არც ერთ სხდომაზე არ შესულა აღნიშნული საკითხის დაჩქარებული წესით განხილვისა და გადაწყვეტილების ინციატივით.
პირიქით, გარემოს დაცვის კომისიის ინიციატივით, საკრებულოში მოწვეულ იქნა არაერთი არასამთავრობო ორგანიზაცია, რომელთა შენიშვნები და რეკომენდაციები აუციელბლად იქნება გათვალისწინებული აღნიშნულ პროექტში.
ხაზი მინდა გავუსვა იმასაც, რომ პროექტის საბოლოო ვერსია, რომელიც ცხოველების მოვლა-პატრონობისა და მათი პოპულაციების მართვის წესს ითვალისიწინებს, ჯერ არ დამტკიცებულა. შესაბამისად, აღმაშფოთებელია ის გარემოება, რომ აღნიშნული საკითხით გულწრფელად დაინტერესებული საზოგადოების შეცდომაში შეყვანა მიზანმიმართულად ხორციელდება. აუცილებლად უნდა აღინიშნოს ისიც, რომ თბილისის მუნიციპალიტეტის მერია და საკრებულო არა მხოლოდ ძაღლების, არამედ თბილისის ტერიტორიაზე, ურბანულ გარემოში მცხოვრები ყველა ცხოველის უფლებებს თანაბრად იცავს.
საზოგადოების მაღალი ინტერესიდან გამომდინარე, მინდა აქვე განვმარტო, რომ წესი, რომელიც საკრებულომ უნდა მიიღოს, ძველი წესის გაუქმებას განაპირობებს , რომლის საკრებულოს მიერ დამტკიცებაც 2012 წლის 31 აგვისტოთი თარიღდება. მინდა შევახსენო ჩემს ყოფილ კოლეგას, ქალბატონ ინგა გრიგოლიას, რომ ეს სწორედ ის პერიოდია, როდესაც იგი თბილისის მუნიციპალიტეტის საკრებულოს წევრი გახლდათ.
ქალაქ თბილისის ტერიტორიაზე ძაღლებისა და კატების მოვლა-პატრონობისა და მათი პოპულაციების მართვის წესის შესახებ საკითხი საკრებულოს სხდომაზე, მე -9 ოქმის შესაბამისად, მესამე საკითხად იყო გატანილი.
აღნიშნულ სხდომაზე, რომელსაც ქალბატონი ინგა გრიგოლიაც ესწრებოდა, მიღებული იქნა პროექტი, რომლის მეცხრე მუხლი „ცხოველების მოკვდინებით“ სათაურდება და გვეუბნება, რომ მოკვდინაბას ექვემდებარებიან ის ცხოველები, რომელთაც კომპეტენტური ვეტერინარის დასკვნის საფუძველზე დაუდგინდებათ ადამიანისათვის საშიში დაავადება. მუხლში ასევე ნათქვამია, რომ ცხოველის მოკვდინება დასაშვებია ვეტერინარის მიერ ცხოველთა თავშესაფარში და უნდა ჩატარდეს მყისებრ, ცხოველისთვის ფიზიკური თუ სულიერი ტანჯვის რაც შეიძლება ნაკლებად მიყენებით.
დოკუმენტი ერთხამდ, ოცდატოთხმეტი ხმით არც ერთის წინააღმდეგ იქნა დამტკიცებული. “-განაცხადა შორენა ბუხრაშვილმა.
