ბანკი „რესპუბლიკა“ ჩვეულებრივ საბანკო საქმიანობასთან ერთად საზოგადოების ცხოვრებაშიც აქტიურადაა ჩართული. ბანკი „რესპუბლიკაში” აცხადებენ, რომ ბანკი ცდილობს, იმ ადამიანების დახმარებას, ვისაც დახმარება ძალიან სჭირდება, რაშიც ბანკს „სოსიეტე ჟენერალის“ 150-წლიანი გამოცდილებაც ეხმარება.
”ჩვენი მეგობრებისთვის არა ერთჯერად, არამედ გრძელვადიან, სამომავლო პროექტებს ვახორციელებთ, რადგან ისინი ჯერ ბავშვები თუ მოზარდები არიან და დამოუკიდებელ მოქალაქეებად უნდა ჩამოყალიბდნენ. ჩვენი მეგობრების ყოველი მიღწევა ჩვენთვის დიდი სტიმულის მომცემია.
„ფსიქოლოგიური მომსახურების ცენტრ მწვანე სახლთან“ უკვე რამდენიმე წელია ვმეგობრობთ. სახლი ექიმ ფრანსუაზ დოლტოს მიერ 1979 წელს შემუშავებული მოდელის La Maison Verte მიხედვით მუშაობს. აქ სპეციალისტები სხვადასხვა ხარისხის ემოციურ, კომუნიკაციის თუ ქცევითი დარღვევების მქონე ბავშვებს ფსიქოლოგიურ დახმარებას უწევენ. ამ ბავშვებში აუტიზმის დიაგნოზის მქონენიც არიან. „მწვანე სახლს“ საქართველოში ორი ფილიალი აქვს, სადაც უკვე 1100-ზე მეტ ბავშვს და მათ მშობლებს გაუწიეს ფსიქოლოგიური დახმარება. ბევრი მათგანი მნიშვნელოვან წინსვლას აჩვენებს, რაც ჩვენთვის ძალიან სასიხარულოა. ვამაყობთ, რომ ჩვენი მეგობრების და მათ მშობლების წარმატებაში ვმონაწილეობთ.
მარინე ტარასაშვილი, „მწვანე სახლის“ პრეზიდენტი: „ნებისმიერი პრობლემის დროს პრევენცია და ადრეული დახმარება ძალიან მნიშვნელოვანია. ასეა ბავშვთა აუტიზმის შემთხვევაშიც. პრევენცია და ადრეული დახმარება კი დაბადებიდანვეა შესაძლებელი, ბავშვის პიროვნების აღიარებით, სოციალიზაციით, მისი მოთხოვნილებების გაგებით და მშობლებისა თუ ოჯახის სხვა წევრების სწორი ურთიერთობებით. ამაში ვეხმარებით მცირეწლოვან ბავშვებსა და მათ მშობლებს და ამ საპასუხისმგებლო ამოცანის სრულყოფილად შესრულებაში კი ბანკ „რესპუბლიკის“ მხარდაჭერა ძალიან მნიშვნელოვანია.“
ჩვენ მომავალშიც გაგაცნობთ ჩვენს სხვა მეგობრებს. ყველა მათგანი ჩვენთვის ერთნაირად ძვირფასია”, აღნიშნულია ბანკი „რესპუბლიკას” განცხადებაში.
