გარემოს დაცვისა და ბუნებრივი რესურსების კომიტეტმა მეორე მოსმენით „გარემოზე ზემოქმედების ნებართვის შესახებ“ კანონსა და „საქართველოს ადმინისტრაციულ სამართლადრღვევათა კოდექსში“ შესატანი ცვლილებები განიხილა.
ცვლილებები სხვადასხვა საქმიანობების გარემოსდაცვით ნორმებთან შესაბამისობაში მოსაყვანად ხორციელდება. მთელი რიგი საქმიანობის განმახორციელებლები (საქართველოს მეტროპოლიტენი, ჰიდროელექტროსადგურები, საქართველოს რკინიგზა, მაგისტრალური გაზსადენები და ნავთობსადენები და ა.შ.)
ფუნქციონირებენ ნებართვის გარეშე. როგორც სხდომაზე აღინიშნა, სახელმწიფოებრივი მნიშვნელობიდან გამომდინარე, მათ საქმიანობას ქვეყნისათვის სასიცოცხლო მნიშვნელობა აქვს და ნებართვის არქონის შემთხვევაშიც კი მიზანშეწონილი არ იქნება მათი საქმიანობის შეჩერება.
გარემოსა და ბუნებრივი რესურსების დაცვის მინისტრის, მაია ბითაძის ინფორმაციით, აღნიშნული ნებართვა საქმიანობის განმახორციელებელს უნდა მიეღო 2010 წლის პირველ იანვრამდე, რაც ვერ იქნა უზრუნველყოფილი კანონმდებლობით დადგენილ ვადაში.
„წარმოდგენილი ცვლილება ითვალისწინებს აღნიშნული საქმიანობებისათვის განსხვავებული რეგულაციის დადგენას. კერძოდ, საქმიანობის განმახორციელებლის მიერ მოხდება მიმდინარე საქმიანობის განხორციელების პროცესში გარემოს არსებული მდგომარეობის შეფასება, მათ შორის ტექნიკური, ეკონომიკური, სოციალური ანალიზი”, -განაცხადა მაია ბითაძემ.
მისივე თქმით, სამინისტროსთან შეთანხმებით, წარმოდგენილი იქნება გარემოსდაცვითი აუდიტის ანგარიში, ასევე, მიმდინარე საქმიანობით გამოწვეული გარემოზე ზემოქმედების შემცირების ღონისძიებათა გრაფიკი და საქმიანობის შესაბამისი პროცედურები. განმახორციელებლის მიერ გონივრულ ვადაში შეთანხმებით დადგენილი პირობების შეუსრულებლობის შემთხვევაში, კანონპორექტი ითვალისწინებს ჯარიმებს. მაია ბითაძის განცხადებით, კანონპროექტში აისახა პირველი მოსმენისას გამოთქმული შენიშვნების უმრავლესობა.
დღესვე, კომიტეტის სხდომაზე, განიხილეს მთავრობის მიერ რატიფიცირებისთვის წარმოდგენილი "საქართველოს და ევროპის საინვესტიციო ბანკს შორის (საქართველო-აღმოსავლეთ-დასავლეთის ჩქაროსნული ავტომაგისტრალი-A)” და "საქართველოს და ევროპის საინვესტიციო ბანკს შორის (საქართველო-აღმოსავლეთ-დასავლეთის ჩქაროსნული ავტომაგისტრალი-ბ)” ფინანსურ ხელშეკრულებაში ცვლილების შეტანის შესახებ“ წერილი-შეთანხმება.
