თბილისის მუნიციპალიტეტის საკრებულოს თავმჯდომარემ გიორგი ალიბეგაშვილმა და ფრაქცია „ქართული ოცნება დემოკრატიული საქართველოსთვის“ კრწანისის რაიონის მაჟორიტარმა დეპუტატმა ბექა ნაცვლიშვილმა ძველი თბილისის მცხოვრებლებსა და სოფელ ფონიჭალის მოსახლეობას ნოვრუზ–ბაირამის დღესასწაული მიულოცეს.
საკრებულოს თავმჯდომარე და მაჟორიტარი დეპუტატი აბანოთუბანს სტუმრობდნენ.
ახუნდოვის ქუჩაზე მოზეიმე მოსახლეობამ გიორგი ალიბეგაშვილი და ბექა ნაცვლიშვილი ტრადიციისამებრ, საზეიმო სუფრაზე მიიპატიჟეს.
საკრებულოს თავმჯდომარემ თანამოქალაქეებს დღესასწაული მიულოცა და მშვიდობა და კეთილდღეობა უსურვა.
„ვულოცავთ ჩვენს თანამოქალაქელ აზერბაიჯანელებს ნოვრუზ–ბაირამის დადგომას, რომელიც მათთვის გაზაფხულის, დიდი სიყვარულისა და პატივისცემის დღეა. ასეთი დღეები უნდა გამრავლდეს ჩვენს ქალაქში. ეს არის ჩვენი ქალაქის პეწი და ლაზათი რომელიც ჩვენს ქალაქს სჭირდება“, – განაცხადა გიორგი ალიბეგაშვილმა და აღნიშნა, რომ ის სითბო და სიყვარული, რომლითაც აბანოთუბნელები მათთვის მისალოცად მისულ თანამოქალაქეებს დახვდნენ თბილისს ძალიან სჭირდება.
ნოვრუზ–ბაირამი თანამოქალაქეებს კრწანისის რაიონის მაჟორიტარმა დეპუტატმა ბექა ნაცვლიშვილმაც მიულოცა და მათი განსაკუთრებული მასპინძლობა აღნიშნა.
“არაჩვეულებრივი მასპინძლობა გაგვიწიეს ჩვენმა აზერბაიჯანელმა თანამოქალაქეებმა, ჩვენმა მეგობრებმა, ამ ძირძველმა თბილისელებმა. ეს სამიათასწლოვანი დიდი ტრადიაციაა, ეს ახალი სიცოცხლის დაწყების დღესასწაულია, ვულოცავ ჩვენს მეგობრებს ამ დღესასწაულს“, – განაცხადა ბექა ნაცვლიშვილმა.
აბანოთუბნიდან, თბილისის საკრებულოს თავმჯდომარე და მაჟორიტარი დეპუტატი, კრწანისის რაიონის გამგებელთან ერთად, აზერბაიჯანელებით დასახლებულ სოფელ ფონიჭალაში გაემგზავრნენ, რათა ნოვრუზ–ბაირამის დღესასწაული იქაური მცხოვრებლებისთვისაც მიელოცათ.
სოფელში, ჩასულმა სტუმრებმა რამდენიმე ოჯახი მოინახულეს, მათ შორის, ის სოციალურად დაუცველი ოჯახები, რომლებსაც დეპუტატის და გამგეობის ძალისხმევით დახმარება გაეწიათ. ასკაროვების, სულეიმანოვებისა და ალიევეების ოჯახებს გიორგი ალიბეგაშვილმა და ბექა ნაცვლიშვილმა სიმბოლური საჩუქრები გადასცეს.
სოფელ ფონიჭალის მოსახლეობამ საკრებულოს თავმჯდომარეს და რაიონის მაჟორიტარ დეპუტატს თანადგომისთვის და დახმარებისთვის მადლობა გადაუხადეს.
