პრემიერ-მინისტრმა, ირაკლი ღარიბაშვილმა ქართველ ჟურნალისტებს პროფესიული დღე მიულოცა და აღნიშნა, მიუხედავად იმისა, რომ მედიის წარმომადგენლები ხშირად აბრაზებენ, ყველანი მაინც ძალიან უყვარს.
"მინდა, საქართველოში იყოს ძლიერი ტელევიზია, ძლიერი ბეჭდული მედია. ყველას გილოცავთ მთელი სულით და გულით. მიუხედავად იმისა, რომ ხანდახან მაბრაზებთ, ყველანი მაინც ძალიან მიყვარხართ", - აცხადებს ღარიბაშვილი.
დღეს, 21 მარტს, ქართული ჟურნალისტიკის დღე აღინიშნება. ქართული ჟურნალისტიკის დღე საქართველოს ჟურნალისტთა ფედერაციამ და თბილისის სახელმწიფო უნივერსიტეტმა 1993 წელს ერთობლივად დააწესეს.
ჟურნალისტისა და ტელეწამყვანის, თამარ ჩიქოვანის შეფასებით, ქართული ჟურნალისტიკა მძიმედ ავადაა, თუმცა დიაგნოზის არსებობის მიუხედავად მისთვის მკურნალობის კურსის დანიშვნა დროში იწელება.
საინფორმაციო სააგენტო "ჯი-ეიჩ-ენი" ქართული ჟურნალისტიკის დღეს საქართველოში მოღვაწე ყველა ჟურნალისტს ულოცავს.