თბილისის მუნიციპალიტეტის საკრებულოს თავმჯდომარის პირველი მოადგილე გიორგი ტყემალაძე აცხადებს, რომ საკრებულოში, თბილისის მუნიციპალიტეტის 2015 წლის ბიუჯეტიდან მე–20 მუხლის ამოღების შესახებ საკითხის განხილვა არ გამართულა. განცხადება ამის შესახებ, ტყემალაძემ ფრაქცია „ნაციონალური მოძრაობის“ წევრის თამაზ შოშიაშვილის მიერ დღეს საკრებულოში გაკეთებული განცხადების კომენტირებისას გააკეთა, რომელშიც შოშიაშვილმა მერიიდან საკრებულოში შესული დოკუმენტი გააკრიტიკა. ტყემალაძე ხაზგასმით აღნიშნავს, რომ გადაწყვეტილება ამ საკითხთან დაკავშირებით ჯერ საკრებულოში მიღებული არ არის. ტყემალაძის განცხადებით, იმისათვის, რომ საკრებულოში რომელიმე საკითხი დამტკიცდეს, მან ჯერ განხილვის რამდენიმე ეტაპი უნდა გაიაროს. „ეს საკითხი საკრებულოში ჯერ არ განიხილულა. საბოლოო გადაწყვეტილება კი მხოლოდ მას შემდეგ იქნება მიღებული რაც მას, შესაბამისი კომისია, შემდეგ კი ფრაქციები განიხილავენ“, – აცხადებს ტყემალაძე. საკრებულოს თავმჯდომარის პირველი მოადგილე აღნიშნავს, რომ მისთვის გაუგებარია თუ რა კავშირია ბიუჯეტიდან მე–20 მუხლის ამოღებასა და კორუფციას შორის, რომელზეც მისი კოლეგები საუბრობენ. საკრებულოს თავმჯდომარის მოადგილე, ოპონენტებს შეახსენებს, რომ საქართველოს ხელისუფლებისა და შს სამინისტროს მხრიდან მერიაში გამოვლენილი დარღვევის არც ერთი ფაქტი რეაგირების გარეშე არ დარჩენილა. „გაუგებარია კავშირი კორუფციასა და ამ მუხლის ამოღებას შორის. ყველა ის ფაქტი, რაც კი მერიაში აქამდე ყოფილა, შს სამინისტროსა და ჩვენი ხელიუფლების მიერ მკაცრად იყო აღკვეთილი. ამ ორ თემას შორის კავშირს მე ნამდვილად ვერ ვხედავ“, –აცხადებს ტყემალაძე და აღნიშნავს, რომ თბილისის მუნიციპალიტეტის 2015 წლის ბიუჯეტიდან მე–20 მუხლის ამოღების საკითხი გადაწყდება ისე, რომ მაქსიმალური კონტროლის ფარგლებში, მერიის ეფექტიან მუშაობას ხელი შეეწყოს.