პე-ეს-პე-ს დამფუძნებლის კახა ოქრიაშვილის "წამლისა და ფარმაცევტული საქმიანობის შესახებ" კანონში შესატან ცვლილებებთან დაკავშირებით, რომელზე მუშაობა თბილისის საკრებულოს იურიდიულ საკითხთა კომისიამ დაიწყო, აცხადებს, რომ ახალი კანონპროექტის ამოქმედების შემთხვევაში ის ბიზნესს თავს დაანებებს
კანონპროექტის მიხედვით, შეფუთვის დაშლის შემთხვევაშიც მომხმარებლისათვის ქართულ ენაზე შედგენილი ანოტაციის მიწოდება ასევე სავალდებულო იქნება. ნორმის დარღვევა დაჯარიმებას გამოიწვევს. შესაბამისი მითითება აფთიაქში თვალსაჩინო ადგილზე იქნება გამოკრული.
პე-ეს-პე-ს დამფუძნებლის კახა ოქრიაშვილის განცხადებით, ახალი კანონპროექტის ამოქმედების შემთხვევაში ის ბიზნესს თავს დაანებებს. როგორც ოქრიაშვილი აცხადებს, მომხმარებელს აფთიაქების ქსელში ქართული ანოტაციის მიღება უკვე შეუძლიათ. მისივე თქმით, აღნიშნული კანონპროექტის ამოქმედების შემთხვევაში, არაერთი მედიკამენტი ბაზრიდან სრულად გაქრება.
„ნებისმიერ მომხმარებელს შეუძლია მოითხოვოს ქართული ანოტაცია და უპრპრობლემოდ ამოუბეჭდავენ. აღნიშნული კანონი დღესაც მოქმედებს. მომწოდებლები, 700 მომწოდებელია, არც ამერიკელები და არც სხვები წამალში ქართულ ანოტაციას არ ჩადებენ. თუ ახალი ინიციატივა ჩადების ფორმით იქნება, მაშინ გაპრობლემდება პროცესი და ძალიან ბევრი მედიკამენტი აღარ იქნება ბაზარზე, შეიქმნება დეფიციტი და პრობლემა. არ ვფიქრობ, რომ ეს არის საკრებულოს საქმე, აღნიშნულზე რეაგირება ჯანდაცვის სამინისტრომ უნდა გააკეთოს. საკრებულომ უნდა მიხედოს თბილისს. მე არ მომიწევს ქართული ანოტაციის დართვა, რადგან ახალი ინიციატივის განხორციელების შემთხვევაში თავს დავანებებ ბიზნესს. სისულელეს არავინ გააკეთებს. თუ ადამიანს სჭირდება ქართული ანოტაცია აფთიაქში ეტყვის, რომ მე მსურს ამა და ამ წამალზე ქართული ანოტაცია და ამოუბეჭდავენ და მისცემენ. ანოტაციას მოსახლეობა დღესაც იღებს“, - კახა ოქრიაშვილი.
