საქართველოს ოკუპირებული რეგიონებიდან იძულებით გადაადგილებულ პირთა, განსახლებისა და ლტოლვილთა სამინისტროსთან ვარკეთილში მცხოვრები დევნილები საპროტესტო აქციას მართავენ. დევნილების მოთხოვნაა მინისტრთან შეხვედრა და პრობლემების მოგვარება. აქციის მონაწილეთა განცხადებით ვარკეთილი 3-ში, II მ/რ-ში 1999 წელს, მაშინდელმა მთავრობამ 180-მდე ოჯახი შეასახლა და ისინი აღნიშნული ფართების მართლზომიერი მფლობელები გახდნენ, მაგრამ, დევნილების თქმით, დაახლოებით ერთი წლის წინ ბინების მესაკუთრეები გამოჩდნენ, რომლებიც თერთმეტამდე ოჯახს ედავებიან ფართს.
აქციის მონაწილეების მოთხოვნაა სამინისტრომ იშუამდგომლოს მესაკუთრეებთან და დაიცვა დევნილთა უფლებები.
“ბოლო ერთი წელია გაყალბებული საბუთებით ჩნდებიან მესაკუთრეები. 11 ოჯახს სასამართლო წესით ედავებიან ბინებს. დევნილთა შესახებ კანონი იცავს მესაკუთრის უფლებებს და არა დევნილის უფლებებს, ანუ მათ უფლება აქვთ მიმართონ სასამართლოს და დევნილის გამოსახლება მოითხოვონ. ამ შემთხვევაში დევნილთა სამინისტრომ დევნილებს უნდა შესთავაზონ ალტერნატიული ფართი. დევნილთა სამინისტრო იმ მესაკუთრეს, რომელიც დევნილებს ედავება ფართს, ერთ კვადრატულში სთავაზობს 50 დოლარს, მაგრამ მესაკუთრე დამატებით კიდევ თანხას ითხოვს დევნილებისგან, რისი საშუალებაც ჩვენ არ გვაქვს. ჩვენ გვსურს, დევნილთა სამინისტრომ იშუამდგომლოს მესაკუთრესთან და მოხდეს პრობლემის მოგვარება”, – აცხადებენ აქციაზე მისული დევნილები.
