ბათუმის რეფერალურ ჰოსპიტალში, ქართველმა მედიკოსებმა ღვიძლის გადანერგვის უკვე მეორე წარმატებული ოპერაცია ჩაატარეს.
ოპერაცია 16 საათის განმავლობაში მიმდინარეობდა. დონორი 34 წლის მამაკაცია, რომელმაც ღვიძლის ნაწილი 33 წლის ძმას გადაუნერგა. პაციენტი ციროზით იყო დაავადებული და მისი გადარჩენის ერთადერთი გზა ღვიძლის გადანერგვა იყო.
ამ დროისათვის პაციენტის ჯანმრთელობის მდგომარეობა, განხორციელებული რთული ოპერაციის შესაბამისია. დონორი უკვე ბინაზეა გაწერილი, ხოლო 33 წლის რეციპიენტი ბათუმის რეფერალურ ჰოსპიტალს რამდენიმე დღეში დატოვებს. ძმების პოსტოპერაციული მართვა სამედიცინო პროტოკოლებითა და საერთაშორისო გაიდლაინების სრული დაცვით მიმდინარეობს.
ღვიძლის უკმარისობით გამოწვეული სიკვდილიანობის მაჩვენებელი საქართველოში საკმაოდ მაღალია და ყოველწლიურად მსგავსი ტიპის ოპერაცია 40-50 ადამიანს ესაჭიროება. ღვიძლის ტრანსპლანტაცია მსოფლიოს 10 ყველაზე რთული ოპერაციის ჩამონათვალში შედის და ეს სერვისი საქართველოში „სამედიცინო კორპორაცია ევექსმა„ 2014 წლის დეკემბრიდან დანერგა.
