აფხაზურმა საინფორმაციო სააგენტოებმა გუშინ გაავრცელეს ინფორმაცია იმის თაობაზე, რომ ოკუპირებული აფხაზეთის საგარეო საქმეთა სამინისტროს წარმომადგენელმა იტალიაში, მაურო მურჯიამ (რომელიც აფხაზების სიძეა) აფხაზეთის სახელმწიფო უნივერსიტეტს 4 უძველესი ისტორიული რუქა გადასცა.
როგორც აღმოჩნდა, აფხაზების სიძის გაოცება იმან გამოიწვია, რომ ამ რუქებზე აფხაზეთის საზღვრები დღეს არსებულ ჩარჩოებშია მოქცეული.
თავად აფხაზმა ისტორიკოსებმაც დიდი განძი და შეუფასებელი საჩუქარი უწოდეს მურჯიას ძღვენს.
როგორც ისტორიის მეცნიერაბათა დოქტორი, პროფესორი გიორგი ოთხმეზური აცხადებს, მაურო მურჯიას მიერ ,,აღმოჩენილ” რუქებში ახალი და განსაკუთრებული არაფერი ჩანს.
,,ამ რუკათაგან არც ერთზე აფხაზეთი, როგორც დამოუკიდებელი პოლიტიკური ერთეული მითითებული არ არის. ხოლო ის ფაქტი, რომ გეოგრაფიულ რუქაზე აფხაზეთის ტერიტორია არის მონიშნული, არავითარ სენსაციას არ წარმოადგენს.
არსებობს იტალიელი კარტოგრაფის ჯაკობო გასტალდის მიერ 1561 წელს შედგენილი რუქა, სადაც პირდაპირ არის მითითებულია ,,აფსუა” ხალხი და მათი ქალაქი ,,აყუა” ყუბანის შუა წელში.
ამავე რუკაზე შავი ზღვის გასწვრივ დასავლეთ საქართველოს მთლიან ტერიტორიას ,,მეგრელია რეგიი” ანუ სამეგრელოს რეგიონი აწერია.
არსებობს ასევე 1660 წლით დათარიღებული რუკა, სადაც ჩრდილო კავკასიაში, ალანებთან ახლოს მითითებულია ხალხი ,,სოჭის აბაზები.”
მე-17 საუკუნის თურქი ისტორიკოსი ევლია ჩელები აფხაზეთის ტერიტორიაზე უკვე ახლადჩამოსახლებულ აფხაზებს ძველი აფხაზებისგან გამოყოფს და ცალკე ასახელებს.
რაც შეეხება 1888 წელს, იმ დროს აფხაზეთის სამთავრო საერთოდ გაუქმებული იყო და მას სოხუმის ოლქი ერქვა.
ამდენად, არაფერი განსაკუთრებული იმაში არ არის, რომ იმ რეგიონს უძველესი დროიდან აფხაზეთი ერქვა და რუქებზეც იყო მითითებული.” - აცხადებს გიორგი ოთხმეზური.
შეგახსენებთ, რომ იტალიაში ოკუპირებული აფხაზეთის საგარეო საქმეთა სამინისტროს წარმომადგენლის, მაურო მურჯიას თქმით, მან 1963, 1725, 1828 და 1888 წლებით დათარიღებული კავკასიის 4 რუკა ლონდონის ერთ-ერთ ანტიკვარიატის მაღაზიაში ნახა და შეიძინა.
,,როცა პირველად ვნახე ეს რუკები, გავოცდი. მათში აფხაზეთი იმ საზღვრებში იყო მოქცეული, რომელშიც ის დღეს არის. პირადად მე, ამ აღმოჩენის შემდეგ უფრო გამიადვილდა მუშაობა.
იტალიაში მიწევს ადამიანებს ავუხსნა, როგორი ქვეყანაა აფხაზეთი და ვინ არიან აფხაზები.” - განაცხადა მან.
აფხაზეთის სახელმწიფო უნივერსიტეტის რექტორის ალეკო გვარამიას განცხადებით, ეს რუკები აფხაზეთის მეცნიერებისა და ისტორიისთვის შეუფასებელი საჩუქარია.