დედაქალაქის მუნიციპალიტეტის საკრებულოს დამოუკიდებელმა დეპუტატმა ალექსანდრე ელისაშვილმა და პუბლიცისტმა ირაკლი კაკაბაძემ თბილისში, კოსტავას ქუჩაზე მიმდინარე მშენებლობის თაობაზე ერთობლივი ბრიფინგი გამართეს.
როგორც დეპუტატმა განაცხადა, კოსტავას N43-ში, კომერციული ნაგებობის მშენებლობა მიმდინარეობს, რაც წინა ხელისუფლების მიერ დანატოვარ სერიოზულ პრობლემას წარმოადგენს.
„მშენებლობა იოსებ ჟორდანიას სახელობის ადამიანის რეპროდუქციის სამეცნიერო კვლევითი ინსტიტუტის უკან მიმდინარეობს და განადგურებით არა მხოლოდ ამ შენობას, არამედ იმ ისტორიულ ქსოვილსაც ემუქრება, რომელიც ვერის ამ მონაკვეთში ჯერ კიდევ შემორჩენილია.
აქედან გამომდინარე, მივმართავთ თბილისის მერიას, შეაჩეროს ეს პროექტი, ვინაიდან მიგვაჩნია, რომ აღნიშნული ნაგებობის მშენებლობის ნებართვა დაუყოვნებლივ გასაუქმებელია.
ჩვენ არ ვებრძვით ბიზნესს, ამიტომაც ვფიქრობთ, რომ ადგილმონაცვლეობის წესის დაცვით, მერიას შეუძლია გამოყოს სხვა ტერიტორია, სადაც ამ პროექტის განხორციელება იქნება შესაძლებელი.
ეს არის წინა ხელისუფლების მიერ დანატოვარი არქიტექტურული და ურბანული ნაღმი, რომელიც ახალმა ხელისუფლებამ უნდა გაანეიტრალოს. ადგილობრივმა მოსახლეობამ აქ საპროტესტო აქციები არაერთხელ გამართა და თუ დედაქალაქის მერია ვერ მოახერხებს ამ პროექტის შეჩერებას, ეს პრობლემებს არა მხოლოდ თბილისის მუნიციპალიტეტს, არამედ ბიზნესმენებსაც შეუქმნის“-განაცხადა ალექსანდრე ელისაშვილმა.