დედაქალაქის მერმა დავით ნარმანიამ თბილისის მთავრობის ახალი წევრები წარადგინა. ვიცე-მერის პოსტზე წარდგენილია დიმიტრი ქუმსიშვილი, მერის მოადგილის პოსტზე - ირაკლი ლექვინაძე, თბილისის მერიის ადმინისტრაციის უფროსად - პაატა ჯაჭვლიანი, ტრანსპორტის საქალაქო სამსახურის უფროსად - გიორგი გურგენიძე, ხოლო ვაკის რაიონის გამგებლად - ლაშა აბაშიძე.
თბილისის ვიცე-მერად წარდგენამდე დიმიტრი ქუმსიშვილი საქართველოს ეკონომიკისა და მდგრადი განვითარების მინისტრის პირველი მოადგილის პოსტს იკავებდა. ის, ასევე, ხელმძღვანელობდა სახელმწიფო ქონების ეროვნულ სააგენტოს. ქუმსიშვილი პროფესიით ეკონომისტია. მას როგორც საჯარო უწყებებში, ისე კერძო კომპანიებში საქმიანობის მრავალწლიანი გამოცდილება აქვს.
თბილისის მერის მოადგილის პოსტზე წარდგენილი ირაკლი ლექვინაძე პროფესიით ეკონომისტია. არის შავი ზღვის საერთაშორისო უნივერსიტეტისა და ილიას სახელმწიფო უნივერსიტეტის მოწვეული ლექტორი. იყო EBRD-ის BAS-ის პროგრამის კონსულტანტი. მას ბიზნეს-ადმინისტრირების მიმართულებით მრავალწლიანი გამოცდილება აქვს.
თბილისის მერიის ადმინისტრაციის უფროსის თანამდებობაზე წარდგენილი პაატა ჯაჭვლიანი 2014 წლის აგვისტოდან თბილისის მერიაში ტრანსპორტის საქალაქო სამსახურს ხელმძღვანელობდა. წლების განმავლობაში ჯაჭვლიანი შემოსავლების სამსახურის საბაჟო და საზღვრის დაცვის დეპარტამენტებში მუშაობდა. არის ომის ვეტერანი, მონაწილეობდა საქართველოს ტერიტორიული მთლიანობისთვის ბრძოლებში.
ტრანსპორტის საქალაქო სამსახურის უფროსის პოსტზე წარდგენილი გიორგი გურგენიძე ბიზნესის ადმინისტრირებისა და სახელმწიფო მმართველობის მაგისტრია. გურგენიძე 2014 წლის სექტემბრიდან დღემდე იყო „სოფლის მეურნეობის პროექტების მართვის სააგენტოს“ ადმინისტრაციული სამსახური უფროსი, ხოლო მანამდე - პრეზიდენტის ადმინისტრაციის უფროსის მოადგილე. წლების განმავლობაში მუშაობდა „საქართველოს რკინიგზაში“ სხვადასხვა საპასუხისმგებლო თანამდებობებზე.
ვაკის რაიონის გამგებლად წარდგენილი ლაშა აბაშიძე 2013-2014 წლებში საქართველოს პრეზიდენტის ადმინისტრაციის უფროსის თანამდებობას იკავებდა, ხოლო მანამდე საქართველოს განათლებისა და მეცნიერების სამინისტროში მუშაობდა. მას აქვს როგორც საქართველოში, ისე საზღვარგარეთ მუშაობის მრავალწლიანი გამოცდილება. დამთავრებული აქვს თბილისის სახელმწიფო უნივერსიტეტი, საზოგადოებრივ საქმეთა ინსტიტუტი და ოქსფორდის უნივერსიტეტი.
დღევანდელ პრესკონფერენციაზე დავით ნარმანიამ მადლობა გადაუხადა ყოფილ ვიცე-მერს ალექსანდრე მარგიშვილსა და მერის ყოფილ მოადგილეს ალუდა გოგლიჩიძეს. მისი თქმით მერიის საქმიანობის მეტი ეფექტურობისთვის საჭირო გახდა წინასაარჩევნო კამპანიის დროს გამოკვეთილი პრიორიტეტების გაძლიერება.
„პირველი პრიორიტეტი ინვესტორებთან უფრო აქტიური მუშაობაა. როგორც იცით, შეიქმნა „მეწარმეობის ხელშეწყობის ცენტრი“, რომელიც ინვესტორთა მხარდაჭერის, მეწარმეობის განვითარებისა და ახალი, წარმატებული კომპანიების შექმნის წახალისების საკითხებზე იმუშავებს. ცენტრის საქმიანობა ხელს შეუწყობს, ასევე, ახალი სამუშაო ადგილების შექნას დედაქალაქში. სწორედ ამ ცენტრს უხელმძღვანელებს ალექსანდრე მარგიშვილი“, - განაცხადა დავით ნარმანიამ.
რაც შეეხება მეორე პრიორიტეტს, თბილისის მერის თქმით, დედაქალაქის ცხოვრებაში ახალგაზრდობის როლის გაზრდაა. „28 თებერვალს თბილისის მერიამ ოფიციალურად გააკეთა განაცხადი 2018 წელს ევროპის ახალგაზრდული დედაქალაქის სტატუსის მოსაპოვებლად. გამარჯვებული ქალაქი 2018 წელს იქცევა ევროპის ახალგაზრდული პოლიტიკის ცენტრად, სადაც ჩატარდება წლის ყველაზე მნიშვნელოვანი ახალგაზრდული ღონისძიებები.
სტატუსის მოსაპოვებლად თბილისის მერიაში მრავალი რეფორმისა და ახალი პროგრამის განხორციელება იგეგმება, მათ შორის მნიშვნელოვანია თბილისის ახალგაზრდული ცენტრის მშენებლობის პროექტი, რომელიც ჩემი წინასაარჩევნო დაპირებაც იყო. დედაქალაქის მერიაში ფუნქციონირებს
„თბილისის ახალგაზრდული ცენტრი“, რომელსაც დღეიდან ალუდა გოგლიჩიძე უხელმძღვანელებს“, - განაცხადა თბილისის მერმა.
თბილისის მთავრობის წევრობის ახალი კანდიდატები დედაქალაქის საკრებულოს დასამტკიცებლად ოფიციალურად დღესვე წარედგინება. საკრებულოში მათი მოსმენა ხვალიდან დაიწყება.