დედისა და ქალთა საერთაშორისო დღეებთან დაკავშირებით, თბილისის მუნიციპალიტეტის საკრებულოს ადამიანის უფლებათა დაცვისა და სამოქალაქო ინტეგრაციის კომისიის თავმჯდომარის გულიკო ზუმბაძის ინიციატივით, საკრებულოში თბილისში მცხოვრები ეთნიკური უმცირესობების წარმომადგენელ ქალბატონებთან შეხვედრა გაიმართა.
როგორც გულიკო ზუმბაძემ აღნიშნა, სხვადასხვა წარმომავლობის მიუხედავად ამ ქალბატონებს საერთო ხედვები, პრობლემები და მიზნები აერთიანებთ. ამიტომ სახელმწიფოს მხრიდან მათი ხელშეწყობა აუცილებელია.
,,ქალს ძალიან ბევრი რამის გაკეთება შეუძლია. მას შეუძლია შეამციროს კონფლიქტები და მთელი მსოფლიო მშვიდობისაკენ წაიყვანოს.
ჩვენი ქალაქი ყოველთვის გამოირჩეოდა სხავადასხვა ეროვნების ადამიანის მიმართ განსაკუთრებული დამოკიდებულებით. ამიტომ ვფიქრობთ, ტრადიცია უნდა გაგრძელდეს. მხოლოდ მას შემდეგ, რაც თითოეული მათგანი ჩვენი მხრიდან მხარდაჭერას, სითბოს და სიყვარულს იგრძნობს, ჩვენს ქვეყანაში ადამიანის უფლებების დაცულობაზე ლაპარაკი თავისუფლად შეიძლება’’,-განაცხადა გულიკო ზუმბაძემ.
ღონისძიებას დედაქალაქის მუნიციპალიტეტის საკრებულოს თავმჯდომარე გიორგი ალიბეგაშვილი დაესწრო, რომელმაც ქალბატონებს გაზაფხულის პირველი დღესასწაული, დედის დღე მიულოცა და საზოგადოებრივ-პოლიტიკურ ცხოვრებაში მათ განსაკუთრებულ ღვაწლს გაუსვა ხაზი.
გიორგი ალიბეგაშვილმა მოწვეულ სტუმრებს განახლებული ჟურნალის ,, ცისკარი 1852“ გამოსვლაც ამცნო და მასში არსებულ რუბრიკაზე ისაუბრა, სადაც ოსურ და აფხაზურ ენებზე ნათარგმნი ქართული ნაწარმოებები იბეჭდება.
როგორც ებრაული თემის წარმომადგენელმა ზაირა დავარაშვილმა განაცხადა, ანალოგიური შეხვედრები აუცილებლად გააერთიანებს სხვადასხვა ეროვნების ადამიანებს, რაც კიდევ უფრო გაზრდის მათ ჩართულობას საქართველოს აღმშენებლობის საქმეში.
შეხვედრის ბოლოს საკრებულოს დეპუტატებმა სტუმრებს სიმბოლური საჩუქრები გადასცეს. გულიკო ზუმბაძე კი ქალთა საბჭომ საქართველოში ტოლერანტობის კულტურის განვითარებაში შეტანილი წვლილისათვის და ქველმოქმედებისათვის სიგელით დააჯილოდოვა.
