ხვალ, 2 მარტს, 12:00 საათზე, სასტუმროში “რადისონ ბლუ ივერია“ გაიმართება საქართველოს პარლამენტის ჯანმრთელობის დაცვისა და სოციალურ საკითხთა კომიტეტის 2015-2016 წლების სამოქმედო გეგმის წარდგენა.
ღონისძიებას დაესწრებიან პარლამენტის წევრები, საქართველოს მთავრობის, საერთაშორისო ორგანიზაციებისა და სამოქალაქო საზოგადოების წარმომადგენლები.
შეკრებილ სტუმრებს სიტყვით მიმართავენ პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარე - დიმიტრი ხუნდაძე, საქართველოს შრომის, ჯანმრთელობისა და სოციალური დაცვის მინისტრი - დავით სერგეენკო, გაეროს განვითარების პროგრამის ხელმძღვანელის მოადგილე - შომბი შარპი, და საქართველოში ევროკავშირის დელეგაციის პოლიტიკის, პრესისა და ინფორმაციის განყოფილების ხელმძღვანელის მოადგილე - დოროტა დლოუხი-სულიგა.
კომიტეტის 2015-2016 წლის სამოქმედო გეგმა ეყრდნობა კომიტეტის საჭიროებათა წინასწარ ჩატარებულ კვლევას და განსაზღვრავს სტრატეგიულ მიზნებს შემდეგი მიმართულებებით:კანონშემოქმედება, ზედამხედველობა, კომუნიკაცია და შიდა ორგანიზაციული განვითარება.
პარალემნტის პრესამსახურის ინფორმაციით, ეს დოკუმენტი ერთ-ერთია იმ ოთხი სამოქმედო გეგმიდან, რომელიც მომზადდა საქართველოს პარლამენტის, ევროკავშირისა და გაეროს განვითარების პროგრამის (UNDP) ერთობლივი პროექტის ფარგლებში. საქართველოს პარლამენტის აგრარულ საკითხთა კომიტეტმა და ადამიანის უფლებათა დაცვისა და სამოქალაქო ინტეგრაციის კომიტეტმა უკვე წარმოადგინეს საკუთარი სამოქმედო გეგმები 25 და 26 თებერვალს. უახლოეს მომავალში ასევე იგეგმება გარემოს დაცვისა და ბუნებრივი რესურსების კომიტეტის სამოქმედო გეგმის წარდგენა.
