ხვალ, 2 მარტს, 17:00 საათზე, სასტუმროში „რედისონ ბლუ ივერია“ გაიმართება საქართველოში გენდერული თანასწორობის პოლიტიკის განხორციელების ეროვნული სამოქმედო გეგმის შესრულების ერთწლიანი შედეგების პრეზენტაცია.
ღონისძიების ორგანიზატორია საქართველოს პარლამენტის გენდერული თანასწორობის საბჭო, გაეროს განვითარების პროგრამისა (UNDP) და შვედეთის მთავრობის ხელშეწყობით.
ღონისძიებას დაესწრებიან საქართველოს მთავრობის, პარლამენტის, საერთაშორისო ორგანიზაციებისა და სამოქალაქო საზოგადოების წარმომადგენლები.
შეკრებას გახსნის საქართველოს პარლამენტის პირველი მოადგილე, გენდერული თანასწორობის საბჭოს თავმჯდომარე - მანანა კობახიძე.
მონაწილეებს სიტყვით მიმართავენ შვედეთის ელჩი საქართველოში - მარტინა ქუიქი, და გაეროს განვითარების პროგრამის ხელმძღვანელის მოადგილე - შომბი შარპი.
2014 წლის იანვარში, საქართველოს პარლამენტმა დაამტკიცა 2014−2016 წლების ეროვნული სამოქმედო გეგმა გენდერული თანასწორობის საკითხებში.
გეგმის შესრულების ერთწლიანი ანგარიში მოიცავს ინფორმაციას 2014 წელს გატარებული ღონისძიებებისა და საკანონმდებლო ინიციატივების შესახებ, რომლებიც ხელს უწყობენ გენდერული თანასწორობის დამკვიდრებას საქართველოს პოლიტიკური, ეკონომიკური და სოციალური ცხოვრების ყველა ასპექტში.
გენდერული თანასწორობის სამოქმედო გეგმის შესრულების შედეგების პრეზენტაცია გახსნის 2015 წლის გენდერული თანასწორობის კვირეულს, რომელიც ტრადიციულად იმართება საქართველოში გაეროს წარმომადგენლობისა და შევედეთის მთავრობის ხელშეწყობით.