დედაქალაქის მუნიციპალიტეტის საკრებულოს ფრაქცია „ქართული ოცნება-დემოკრატიული საქართველოსთვის“ თავმჯდომარე, ჩუღურეთის რაიონის მაჟორიტარი დეპუტატი რიმა ბერაძე, ქართველი საზოგადო მოღვაწისა და პოეტის, სიმბოლისტ პოეტთა და პროზაიკოსთა შემოქმედებითი გაერთიანება „ცისფერყანწელთა“ ერთ-ერთი წარმომადგენლის, კოლაუ ნადირაძის ხსოვნისადმი მიძღვნილი მემორიალური დაფის გახსნას დაესწრო.
რიმა ბერაძემ მოწვეულ სტუმრებს სიტყვით მიმართა და აღნიშნა, რომ ისეთი დიდი ქართველის ხსოვნის უკვდავყოფა, როგორიც კოლაუ ნადირაძე იყო, სამაგალითო უნდა იყოს თითოეული ქართველისათვის, ვინაიდან მომავალი თაობების ქვეყნის სიყვარულის სულისკვეთებით აღზრდა, სწორედ ასეთი გზითაა შესაძლებელი.
„ჩუღურეთის სამაჟორიტარო ბიუროში წერილით ფონდი „ცისფერყანწელთა ხსოვნისათვის“ დამფუძნებელმა და აღმასრულებელმა დირექტორმა, ნინო ჩხიკვიშვილმა მოგვმართა, სადაც იგი დიდი ქართველი პოეტის ხსოვნის უკვდავსაყოფი ღონისძიებების განხორციელებას, კერძოდ კი, კოლაუ ნადირაძის საცხოვრებელ სახლზე ქართველი ცისფერყანწელის 120 წლის იუბილესადმი მიძღვნილი მემორიალური დაფის გახსნისა და მისი შემოქმედების ამსახველი აუდიო-ფირფიტის გამოშვებას გვთხოვდა. მინდა აღვნიშნო, რომ თბილისის მერიის კულტურის საქალაქო სამსახურის თანადგომით, ჩვენ შევძელით ამ შესანიშნავი იდეის განხორციელებადა მომავალშიც ვგეგმავთ მისი ხსოვნისადმი მიძღვნილი სხვა ღონისძიების გამართვას.“-აღნიშნა რიმა ბერაძემ.
კოლაუ ნადირაძის მემორიალური დაფა, წინამძღვრიშვილის ქუჩაზე, მისი საცხოვრებელი სახლის კედელზე განთავსდა, სადაც იგი ქუთაისიდან დედაქალაქში გადმოსვლის შემდეგ, 1940-59 წლებში ცხოვრობდა და მოღვაწეობდა. ახლო მომავალში დაგეგმილია მისი ბიოგრაფიისა და შემოქმედების ამსახველი აუდიო-ფირფიტების ჩაწერა და პრეზენტაცია.
ღონისძიებას თბილისის მერიის კულტურის საქალაქო სამსახურისა და ჩუღურეთის რაიონის სამაჟორიტარო ბიუროს წარმომადგენლები, ასევე კოლაუ ნადირაძის ოჯახის წევრები და სხვა მოწვეული სტუმრები ესწრებოდნენ.