C ჰეპატიტის გავრცელების წინაღმდეგ მიმართულ პროგრამის ''STOP C''-ს ფარგლებში, სტომატოლოგიურ კლინიკებთან შექმნილი ვითარების გამო საქართველოს სამედიცინო ასოციაციების გაერთიანება, მისი წევრი ორგანიზაციის სტომატოლოგთა პროფესიული ასოციაციის განცხადებას ავრცელებს. განცხადებაში აღნიშნულია, სტომატოლოგიურ კლინიკებში ინფექციის კონტროლისათვის მაღალკვალიფიციური კადრებია საჭირო, რისთვისაც კადრების პროფესიულ გადამზადება უნდა მოხდეს.
„სტომატოლოგიურ კლინიკებში ინფექციის კონტროლის, საშუალო მედპერსონალის მომზადების დონისა და სასტერილიზაციო ბლოკის გამართული მუშაობის, თანამედროვე ტიპის სასტერილიზაციო სეგმენტის აღჭურვის მდგომარეობიდან გამომდინარე სამედიცინო ასოციაციების გაერთიანების, სტომატოლოგთა პროფესიული ასოციაცია და მისი პრეზიდენტი, პროფესორი მარინა მამალაძე კადრების პროფესიულ გადამზადებას მიიჩნევს. სტომატოლოგიური კლინიკები პირველადი დარტყმის ქვეშ აღმოჩნდნენ, რადგან მათი ყოვლად დაუშვებელი ჭარბი რაოდენობა, ზოგიერთი კლინიკის სამედიცინო პერსონალის დაბალი კვალიფიკაცია, პროფესიული გულგრილობა და დაბალი კომპეტენცია ზრდის განსაკუთრებით საშიში ინფექციების გავრცელების რისკებს და ჩრდილს აყენებს სხვა საექიმო პასუხისმგებლობის მქონე ექიმების, ზოგადი მედპერსონალის და კლინიკის რეპუტაციას”,- აღნიშნულია განცხადებაში.
განცხადებაში ასევე აღნიშნულია, რომ გასათვალისწინებელია ის ფაქტი, რომ ხშირად კლინიკებში ამორტიზებული, მოძველებული სასტერილიზაციო აპარატურა დგას, რომელიც ვერ პასუხობს თანამედროვე მოთხოვნებს და შესაბამისად, აქვეითებს ინსტრუმენტების სტერილობის ხარისხს.
”საქართველოს სამედიცინო ასოციაციების გაერთიანების, სტომატოლოგთა პროფესიული ასოციაცია ერთ-ერთი პირველი გამოეხმაურა ფართო მასშტაბიან აქციას '''STOP C'', რომლის ფარგლებშიც სპეციალური შეხვედრა მოეწყო, სადაც ქალაქ თბილისის სამოცზე მეტმა სტომატოლოგიურმა კლინიკამ მიიღო მონაწილეობა. შექმნილი ვითარებიდან გამომდინარე საქართველოს სტომატოლოგთა პროფესიულმა ასოციაციამ, თხოვნით მიმართა ლევან საყვარელიძის სახელობის დაავადებათა კონტროლისა და საზოგადოებრივი ჯანმრთელობის ეროვნულ ცენტრს და მის დირექტორს, პროფესორ ამირან გამყრელიძეს შემუშავებულიყო ერთიანი საგანმანათლებლო პროგრამა უწყვეტი პროფესიული განვითარების რანგში. ამ პროგრამის გავლა აუცილებელი უნდა იყოს სტომატოლოგიურ კლინიკებში მომუშავე არა მხოლოდ ექიმებისთვის, არამედ საშუალო მედპერსონალისთვისაც. ამ მიმართულებით დაწყებულია მუშაობა და მზადდება პროგრამა, რომელიც სულ მალე თბილისის სახელმწიფო სამედიცინო უნივერსიტეტის დიპლომის შემდგომი განათლების და უწყვეტი პროფესიული განვითარების ინსტიტუტის საბჭოზე დამტკიცდება. პარალელურად მიმიდინარეობს დამხმარე სახელმძღვანელოს შედგენა, სადაც დეტალურად იქნება განხილული ინფექციასთან ბრძოლის ის თანამედროვე მეთოდები, რომლებიც საერთაშორისო ევროპულ სტანდარტს შეესაბამება”, ნათქვამია სტომატოლოგთა პროფესიული ასოციაციის განცხადებაში.