პარლამენტის ადამიანის უფლებათა დაცვისა და სამოქალაქო ინტეგრაციის კომიტეტი საქველმოქმედო აქციას იწყებს.
აქციის მიზანს სასჯელაღსრულების დაწესებულებებში მყოფ პატიმართათვის სხვადასხვა სახის წიგნების შეგროვება და გადაცემა წარმოადგენს.
,,კომიტეტს წერილობით მომართა მე-8 საპყრობილეში მყოფმა ერთ-ერთმა მსჯავრდებულმა და დაწესებულების მწირი ბიბლიოთეკისთვის რამდენიმე წიგნის დამატება გვთხოვა. შესაბამისად, კომიტეტმა საქველმოქმედო აქციის დაწყების შესახებ გადაწყვეტილება მიიღო, რაც მსჯავრდებულთათვის წიგნების შეგროვებას გულისხმობს. მინდა მოვუწოდო ყველა დაინტერესებულ პირს, როგორც პარლამენტის წევრებს, აპარატის თანამშრომლებს, ასევე საზოგადოების სხვადასხვა წარმომადგენლებს აქტიურად ჩაერთონ პოზიტიურ აქციაში და თავისი წვლილი შეიტანონ ამ მნიშვნელოვან საქმეში“, - განაცხადა კომიტეტის თავმჯდომარემ ეკა ბესელიამ.
საქველმოქმედო აქცია დაახლოებით ერთ თვეს გაგრძელდება და სასჯელაღსრულების სხვადასხვა დაწესებულებებში შეგროვებული წიგნების გადაცემა აღდგომის ბრწყინვალე დღესასწაულისთვის მოხდება.
