კრწანისის რაიონის მაჟორიტარი დეპუტატის ბექა ნაცვლიშვილის ინიციატივით, საზოგადოებრივი სათათბირო შეიქმნა, რომელიც რაიონის მაცხოვრებლებსა და მაჟორიტარის ბიუროს შორის მჭიდრო კავშირის დამყარებას უზრუნველყოფს. დღეს საბჭოს პირველი გაფართოებული სხდომა გაიმართა, რომელზეც რაიონის განვითარების ვიზუალური პრეზენტაცია გაიმართა.
როგორც ბექა ნაცვლიშვილმა განაცხადა, აღნიშნული მექანიზმი მოსახლეობის ინფორმირებასა და მათი ადგილობრივი თვითმმართველობის პრიორიტეტების განსაზღვრის პროცესში ჩართულობას შეუწყობს ხელს, რაც მყარ საფუძველს ქმნის იმისათვის, რომ ნებისმიერი გადაწყვეტილება მაქსიმალურად ასახავდეს მოქალაქეების ნება - სურვილს. ,, სათათბირო სხდომები და შეხვედრები თვეში ერთხელ გაიმართება, რომელზეც კრწანისის რაიონის მოსახლეობა შესრულებული სამუშაოს შესახებ ანგარიშს მოისმენს.
ასევე ვისაუბრებთ მომავალ გეგმებზე, რაც, რა თქმა უნდა გაზრდის მათ ჩართულობას გადაწყვეტილების მიღების პროცესში“, - განაცხადა ბექა ნაცვლიშვილმა. მისივე თქმით, საბჭოს სხდომებში მონაწილეობის მიღება შეუძლია ნებისმიერ მოქალაქეს, რომელიც მზად არის საზოგადოებრივ საწყისებზე გახდეს საკუთარი ქუჩის, სახლისა თუ უბნის წარმომადგენელი სათათბიროში.
სხდომას კრწანისის რაიონის გამგებელი გიორგი კოპალეიშვილი, ადგილობრივი მუნიციპალიტეტის წარმომადგენლები და კრწანისის რაიონის მაცხოვრებლები ესწრებოდნენ. ,,საზოგადოებრივი სათათბიროს შექმნა საფუძველს ქმნის იმისთვის, რომ ადგილობრივი თვითმართველობა გადაწყვეტილებების მიღებისას მაქსიმალურად ითვალისწინებდეს მოსახლეობის ნება სურვილს“,- განაცხადა გიორგი კოპალეიშვილმა და დასძინა, რომ ანალოგიური შეხვედრები კიდევ უფრო გაამარტივებს მოსახლეობის პრობლემების მოგვარებას.
კრწანისის რაიონის მოსახლეობა ბექა ნაცვლიშვილის ინიციატივას მიესალმება და იმედს გამოთქვამს, რომ მაჟორიტართან და გამგებელთან უშუალო კომუნიკაცია დადებათად აისახება თითოეული მოქალაქის სოციალურ თუ ეკონომიურ ყოფაზე.